RDC: Komisiyo y’amatora yatangaje uwatsindiye kuba Perezida wa Repubulika
Komisiyo y’amatora muri Repubulika iharanira Demokarasi ya Congo yatangaje ko Felix Tshisekedi wo mu ishyaka ritavuga rumwe n’ubutegetsi ari we wegukanye amatora y’umukuru w’igihugu.
Ni amakuru yemejwe na Perezida wa Komisiyo y’amatora muri Congo Kinshasa(CENI), Corneille Nanga.
Yagize ati”Nyuma yo kubona amajwi angana na 38.57% by’amajwi yose y’abatoye, Felix Tshiseked atangajwe nka Perezida wa Repubulika iharanira Demokarasi ya Congo watowe n’abaturage.”
Ibyavuye mu matora bigitangazwa kuri komisiyo y’igihugu y’amatora hahise haduka urusaku rw’ibyishimo kuri benshi mu bari bashyigikiye uyu mugabo ugiye gusimbura Perezida Joseph Kabila nyuma y’imyaka 18.
Repubulika iharanira Demokarasi ya Congo ibonye Perezida nyuma y’imyaka ibiri yugarijwe n’imidugararo yatewe no kubura umusimbura Joseph Kabila wari waragundiriye ubutegetsi, nyuma muri 2018 agatangaza ko ataziyamamaza mu matora y’ugomba kumusimbura.
Perezida Kabila uyu yari ashyigikiye mu matora inkoramutima ye Emmanuel Ramazani Shadary, gusa uyu ntiyahiriwe n’amatora kuko yaje ku mwanya wa gatatu.
Ibyavuye mu matora kandi bigaragaza ko Martin Fayulu wahabwaga amahirwe menshi yo gusimbura Kabila yaje ku mwanya wa kabiri, inyuma ya Tshisekedi.
Ingengabihe y’ibanze ya CENI yavugaga ko ibyavuye mu matora bizatangazwa ku wa 15 Mutarama 2019, hanyuma umuhango w’irahira rya Perezida ukaba nyuma y’iminsi itatu.
