Rayon Sports yategetswe kwishyura Ivan Minnaert akayabo ka 35,000$
Akanama gashinzwe gukemura amakimbirane muri FERWAFA, kategetse ikipe ya Rayon Sports kwishyura Umubiligi Ivan Jacky Minnaert wahoze ari umutoza wayo, nyuma yo gusanga iyi kipe yarirukanye uyu mutoza mu buryo bunyuranyije n’amategeko.
Ivan Jacky Minaert ahagarariwe na Me Olivier Mulindahabi, bari bareze Rayon Sports ku wa 04 Ukwakira 2018 basaba kurenganurwa nyuma y’uko uyu mutoza yari amaze guhabwa ibaruwa isesa amasezerano ye. Rayon Sports yashinjaga umutoza Minnaert ikosa ryo gusagararira umwe mu bagize itsinda ry’abatoza(Staff Technique) Hategekimana Corneille.
Amakuru avuga ko Rayon Sports ikimara kwambura Minnaert inshingano z’ubutoza, ngo yaje kumwizeza kuzamuha 15,000$ hanyuma ikanamugira umuyobozi wa siporo ariko birangira bamuhaye amafaranga inshingano zo barazimwima.
Itangazo akanama gashinzwe gukemura amakimbirane muri FERWAFA kashyize ahagaragara, rivuga ko ubusabe bwa Minnaert bufite ishingiro, bityo Rayon Sports ikaba itegetswe kumwishyura 35,000$.
Aya mafaranga akubiyemo 4,000$ y’uko Minnaert yirukanwe nta nteguza yahawe, amafaranga y’ibirarane by’amezi ya Kamena na Nyakanga 2018, uduhimbazamusyi tw’imikino ibiri ya shampiyona Minnaert yatsinze, 5% by’amafaranga yahembwe nyuma yo kugera muri 1/4 cya CAF Confederations Cup ndetse n’itike y’indege yari kumujyana no kumugarura i Bruxelles.’
Rayon Sports kandi yategetswe kwishyura 10,000$ yo guhemba umwavoka waburaniye umutoza Minnaert.
Ubuyobozi bwa Rayon Sports binyuze muri Nkurunziza Jean Paul usanzwe ari umuvugizi w’iyi kipe, bwemeje ko bwiteguye kujuririra kiriya cyemezo bafatiwe.
