Rayon Sports yamaze kubona umutoza w’abazamu ukomoka muri Uganda
Ikipe ya Rayon Sports yemeje Umunya-Uganda Hannington Kalyesubula nk’umutoza wayo w’abazamu, akaba yaje gusimbura Ikamba Lemlem (Nkunzingoma Ramadhan) wamaze kuva muri iyi kipe yerekeza muri Police FC.
Iyi kipe ikundwa na benshi yemeje ko yamaze gusinyana amasezerano n’uyu mutoza ibinyujije ku rubuga rwayo rwa Twitter. Hannington Kalyesubula yari umutoza w’abazamu ba Villa Sports Club yo muri Uganda, akaba yasinye amasezerano y’umwaka umwe yo gutoza Rayon Sports.
@rayon_sports inejejwe no gutangaza ko Hannington Kalyesubula watozaga abazamu b'ikipe ya #VillaSC yasinye amasezerano y’umwaka umwe nk’umutoza wa abazamu ba @rayon_sports. #Gikundiro pic.twitter.com/FZuwCZsy68
— Rayon Sports Official (@rayon_sports) August 1, 2019
Aje gufasha Rayon Sports mu rugamba rw’imikino ya CAF Champions league irimo, aho igomba gucakirana na Al Hilal Omdurman yo muri Sudani, mu ijonjora ry’ibanze ry’iri rushanwa rihuza amakipe yabaye aya mbere iwayo hano ku mugabane wa Afurika.
Kuba Rayon Sports yabonye umutoza w’abazamu bisobanuye ko Staff yayo iri mu nzira zo kuzura, kuko ubu uwo ibura ari umuzamu ushinzwe kongerera ingufu abakinnyi na we byitezwe ko aboneka mu gihe cya vuba.
