Rayon Sports yamaze gutandukana n’umwe muri ba bakinnyi 2 yari yakuye mu Burengerazuba bwa Afurika
Ikipe ya Rayon Sports kuri ubu yamaze gusezerera Kouame Brou Gerard Stephane, rutahizamu wo mu gihugu cya Cote d’Ivoire yari imaze ibyumweru birenga bibiri isinyishije.
Uyu mukinnyi ukina utaha izamu yari yazanye muri iyi kipe na Donkor Prosper, mugenzi we w’umunya-Ghana ukina hagati mu kibuga. Ku wa 14 Kanama, ni bwo ikipe ya Rayon Sports ibicishije kuri Twitter yayo, yatangaje ko yamaze gusinyisha aba bakinnyi bombi bari bazanwe nk’abasimbura ba Kwizera Pierrot na Ismailla Diarra.
Gusa nyuma yo gusanga uyu rutahizamu wazanwe nk’umusimbura wa Diarra atari ku rwego rwa rutahizamu Rayon Sports yumva ikeneye, bahisemo kumwereka umuryango usohoka.
Aganira n’itangazamakuru, Rutahizamu Kouame yari yatangaje ko ikimuzanye i Kigali ari ugushimisha abafana ba Rayon Sports.
Uyu mukinnyi yasezerewe kandi mu gihe ubuyobozi bwa Rayon Sports bwari bwaramaze no kumushakira ibyangombwa bya FIFA bimwemerera gukinira iyi kipe imikino yose.
