Rayon Sports yamaze gusinyisha myugariro wakiniraga Mukura VS
Ikipe ya Rayon Sports yamaze gusinyisha myugariro Iragire Saidi wakiniraga ikipe ya Mukura VS yo mu karere ka Huye.
Uyu musore usanzwe akina mu mutima w’ubwugarizi, yasinye amasezerano y’imyaka ibiri mu kipe ya Rayon Sports nk’uko iyi kipe y’ubururu n’umweru yabyemeje ibinyujije kuri Twitte yayo.
Mukura VS yakiniraga na yo yari yatangaje ko yamaze gutandukana na we, inamwifuriza amahirwe masa ku handi yerekeje.
Rayon Sports yafashe iya mbere mu kongera kwiyubaka bundi bushya, mu rwego rwo kwitegura hakiri kare imikno ya CAF Champions league izaba ihagarariyemo u Rwanda.
Myugariro Saidi, ni we ikipe ya Mukura VS yari yubakiyeho ubwugarizi bwayo nyuma yo gutandukana n’umurundi David Nshimirimana wamaze kwerekeza muri Buildcon FC yo muri Zambia. Aba basore bombi ni bo bari bahetse ubwugarizi bw’iyi kipe ubwo yegukanaga igikombe cy’amahoro cy’umwaka ushize.
Aba basore kandi bafashije Mukura VS kugera mu ijonjora rya nyuma rya CAF Confederations Cup nyuma yo gusezerera Free State Stars yo muri Afurika y’Epfo na Al Hilal Omudurman yo muri Sudan.
