Rayon Sports yakubise itababarira ikipe ya KIYOVU Sports
Ikipe ya Rayon Sports yatsinze Kiyovu Sports ibitego 3-0 iyitwara igikombe cya “RNIT Savings Cup” mu mukino wabereye kuri Stade ya Kigali Pele Stadium.
Imyaka 4 yari ishize Rayon Sports itabasha gutsinda Kiyovu Sports, yabiherukaga tariki ya 1 Ukuboza 2019 ubwo yayitsindaga 1-0.
Kiyovu Sports yatangiye neza ubwo kumunota wa 2 w’umukino, Nizeyimana Djuma yahinduraga umupira mwiza imbere y’izamu rya Rayon Sports ariko habura ushyira mu rushundura.
Kalisa Rashid yagerageje ishoti rikomeye yatereye inyuma y’urubuga rw’amahina ku munota wa 7 ariko umunyezamu Emmanuel Kalyowa awohereza muri koruneri.
Rayon Sports yari yacuritse ikibuga yaje kubona amahirwe ku munota wa 13 ariko Esenu awuteye umunyezamu awukuramo.
Ku munota wa 16, Rayon Sports yabonye penaliti nyuma y’uko Niyonkuru Ramadhan akoreye umupira mu rubuga rw’amahina, yaje kwinjizwa neza na Héritier Nzinga Luvumbu.
Rayon Sports yaje guhura n’ikibazo cy’imvune ku munota wa 42 aho Youssef Rharb wavunitse yasimbuwe na Ndekwe Felix. Igice cya mbere cyarangiye ari 1-0.
Ku munota wa 53, Kiyovu Sports yabonye ikarita itukura yahawe Eric Iracyadukunda ku ikosa yakoze maze ahabwa umuhondo wa kabiri.
Kiyovu Sports yagerageje gushaka uko yakwishyura iki gitego biranga ahubwo Rayon Sports iza kuyitsinda igitego cya kabiri ku munota wa 74 cyatsinzwe na Luvumbu ku ishoti rikomeye yatereye inyuma y’urubuga rw’amahina.
Charles Bbaale winjiye mu kibuga asimbuye Eid Mugadam, yatsindiye Rayon Sports agashinguracumu ku munota wa 85, ni ku mupira Ojera Joackiam yahinduye imbere y’izamu ariko umunyezamu Kalyowa kuwufata ngo awukomeze bikanga
Bbaale ahita awushyira mu nshundura.
Uyu mukino warangiye Rayon Sports itsinze ibitego 3-0.
Rayon Sports yegukanye “RNIT Savings Cup” yahawe miliyoni 3 Frw n’igikombe, ni mu gihe Kiyovu Sports yahawe imidali na miliyoni 1,5 Frw.
Umukino wa nyuma wabanjirijwe n’umwanya wa 3 wegukanywe na Etoile del’Est itsinze AS Kigali 1-0 aho yahawe imidali na miliyoni imwe y’amafaranga y’u Rwanda.
