Rayon Sports na Kiyovu zatumijweho ngo zisobanure kuri rwa rubanza rwazo
Ubuyobozi bw’ishyirahamwe ry’umupira w’amaguru hano mu Rwanda FERWAFA, bwamaze guhamagaza amakipe ya Rayon Sports na Kiyovu Sports ngo yisobanure ku kibazo cya Ambulance bivugwa ko Kiyovu Sports yari yakodesheje ntiyihabwe biturutse kuri Rayon Sports bikayiviramo guterwa mpaga.
Ikibazo hagati y’aya makipe yombi cyavutse ku wa 18 Kamena ubwo Kiyovu Sports yatererwaga mpaga na Kirehe ku Mumena, nyuma yo kubura imbangukiragutabara ku kibuga nk’uko amategeko ya FERWAFA abivuga.
Nyuma byaje kugaragara ko Ambulance Kiyovu yakabaye yarazanye ku Kibuga Rayon Sports yayiciye inyuma ikajya kuyitira, nyuma yo kubeshya ku bitaro Kiyovu yari yayitiyeho ko iyi kipe yo ku Mumena itagikiniye umukino wayo mu mujyi wa Kigali.
Ibi byatumye ikipe ya Kiyovu Sports yijujuta cyane igaragaza ko yagambaniwe nkana na mukeba wayo, birangira inagejeje ikibazo cyayo ku buyobozi bwa FERWAFA.
Mu gihe nta kanunu k’iki cyibazo kaherukaga, ishyirahamwe ry’umupira w’amaguru FERWAFA byarangiye ritumijeho aya makipe yombi kuri uyu wa mbere mu rwego rwo kurebera hamwe uko ikibazo giteye no kukivugutira umuti.
Ku rundi n’ubwo Kiyovu Sports ivuga ko yagambaniwe, Rayon Sports yo ivuga ko iby’iki kibazo bitayireba ngo kuko ntaho ihuriye na cyo.
