Rayon Sports mu cyuho cy’ubwugarizi mbere yo gukina na Mamelodi Sundowns
Ikipe ya Rayon Sports igomba gukina na Mamelodi Sundowns idafite Manzi Thierry utemerewe gukina uyu mukino, nyuma y’amakarita y’umuhondo uyu musore yeretswe mu mikino 2 y’ijonjora ry’ibanze Rayon Sports yahuyemo na Lydia Ludic Academique.
Ibi bigaragaye nyuma y’ibaruwa ishyirahamwe ry’umupira w’amaguru ku mugabane wa Afurika CAF ryandikiye ikipe ya Rayon Sports, imenyesha ko uyu mukinnyi atemerewe gukina uyu mukino ugomba guhuza iyi kipe y’ubururu n’umweru na Mamelodi Sundowns, muri 1/16 cya CAF Champions league.
Uyu mukino ubanza uteganyijwe kuba ku wa gatatu w’icyumweru gitaha, ukazabera kuri Stade national Amahoro I Remera saa 18:00.
Iki kibazo cya Manzi Thierry kije cyiyongera ku cya Mugabo Gabriel wagize imvune mu mukino Rayon Sports yatsinzemo 1-0 Gicumbi ejo hashize, bikaba bivuze ko Rayon Sports izaba ifite Faustin Usengimana na Ange Mutsinzi nk’abakinnyi bakina mu mutima wa defense rukumbi bazaba bagaragara ku mukino wa Mamelodi Sundowns.
Cyakora cyo iyi kipe ifite amahirwe yo gukinisha Yassin Mugume na Mbondi Chris batagaragaye ku mikino yombi ya LLB, gusa aba basore bombi bakina nk’abataha izamu.
