Rayon Sports izajya gukina na USM Alger ibura 5 b’inkingi za mwamba
Kuri uyu wa kane ni bwo ikipe ya Rayon Sports igomba guhaguruka yerekeza i Algies muri Algeria aho izaba igiye gukina umukino wa mbere wo kwishyura mu matsinda ya CAF Confederations Cup, umukino igomba gukina idafite abakinnyi batanu bayo b’inkingi za mwamba.
Uyu mukino ugomba kubera i Alger kuri iki cyumweru, nyuma y’umukino ubanza wabereye kuri Stade ya Kigali warangiye USM Alger yegukanye amanota 3 nyuma yo kuwutsinda ku bitego 2-1.
Rayon Sports ifite ibibazo by’abakinnyi b’inkingi za mwamba bafite imvune, yongeye gukomwa mu nkokora n’itangazo yohererejwe n’impuzamashyirahamwe y’umupira w’amaguru ku mugabane wa Afurika CAF rivuga ko Kevin Muhire na Mutsinzi Ange Jimmy batemerewe gukina umukino wo kwishyura wa USM Alger kubera amakarita y’umuhondo.
Aba basore babiri biyongera kuri Eric Rutanga wafashe n’imbwa(Hamstring) na Niyonzima Olivier Sefu ufite imvune, aba bombi bikaba byaravuzwe y’uko bagomba kumara hanze ibyumweru bibiri.
Undi bivugwa ko ashobora kudakina uyu mukino ni kapiteni Kwizera Pierrot uri mu nzira zo gusoza amasezerano muri iyi kipe y’Ubururu n’umweru. Magingo aya Kwizera Pierrot ari iwabo mu Burundi aho yagiye gushaka ibyangombwa bimwemerera kujya mu bihugu by’Abarabu dore ko hari yo amakipe menshi akomeje kumwifuza.
Amakuru meza ku kipe ya Rayon Sports ni uko Yannick Mukunzi utarakinnye umukino ubanza wa USM Alger yamaze kugaruka mu myitozo, akaba anafite amahirwe menshi yo gukina umukino wo ku cyumweru.
