Rayon Sports itsinze Kiyovu Sports ikomeza gusatira APR FC
Rayon Sports ibifashijwemo n’umunye-Ghana Michael Sarpong itsinze Kiyovu Sports mu mukino wabereye kuri Stade ya Kigali i Nyamirambo kuri uyu wa Kane saa 15:30.
Ni umukino w’ikirarane w’umunsi wa 21 bakinaga utarabereye igihe bitewe n’uko aya makipe yari afite abakinnyi mu makipe y’ibihugu bitandukanye bya Afurika byari byagiye gukina imikino yo gushaka itike yo gukina igikombe cya Afurika.
Igice cya mbere cyarangiye amakipe yombi anganya 0-0 ndetse nta kipe irusha indi ku buryo bugaragara.
Nkuko Roberto Oliveira Goncalves do Carmo utoza Rayon Sports yabitangarije AZAM TV umukino ukirangira, mu kiruhuko cy’igice cya mbere yasabye abakinnyi be gushira ingufu mu gushaka ibitego bakabuza uburyo abugarira ba Kiyovu Sports.
Niko byagenze maze ku munota wa 55 w’umukino Sarpong atsinda igitego n’umutwe ku mupira yari ahawe na Rutanga Eric ku burangare bw’ubwugarizi bwa Kiyovu Sports maze uyu munya-Ghana atera umutwe mu izamu ahagaze wenyine.
Sarpong yagitsinze muri stade harimo umukunzi we usanzwe ari umuhanzi Asinah.
Umukino warangiye ari 1-0, bituma iguma ku mwanya wa kabiri n’amanota 47 ku rutonde rwa shampiyona ruyobowe na APR FC n’amanota 51.
Imibare igaragaza ko Rayon Sports yateye mu izamu amashoti 7 Kiyovu Sports yo nta na rimwe, Rayon Sports ibona koroneri 7, amakosa 10, amakarita y’umuhondo 4 inarusha Kiyovu Sports ku kigero cya 55% mu gihe Kiyovu Sports yo yabonye koroneri 2, amakosa 5amakarita 4 y’umuhondo.
Umukino ubanza Kiyovu Sports yari yatsinze Rayon Sports 2-1.
Rayon Sports yari yabanje mu kibuga umunyezamu Mazimpaka Andre (GK,30), Iradukunda Eric Radou 14, Eric Rutanga Alba 3, Manzi Thierry (C,4), Mutsinzi Ange Jimmy 5, Habimana Hussein Eto’o 20, Donkor Prosper Kuka 8, Mugheni Kakule Fabrice 27, Manishimwe Djabel 10, Mugisha Gilbert 12 na Sarpong Michael 19.
Ku rundi ruhande Kiyovu Sports yo yari yabanje umunyezamu Ndoli Jean Claude (GK,1), Serumogo Ally 2, Ahoyikuye Jean Paul Mukonya 4, Uwineza Rwabuhihi Aime Placide 6, Ngirimana Alex (C,15), Habamahoro Vincent 13, Kalisa Rachid 8, Nizeyimana Djuma 9, Yamini Salum 10, Gyslain Armel 14 na Heron Scarla 17
[team_standings 32825]
