Rayon Sports ibabaje Kiyovu yari yahize kuyambika amakanzu, Police FC ibabazwa na AS Muhanga
Kuri iki Cyumweru umukino w’umunsi wa 11 wa shampiyona y’icyiciro cya mbere mu Rwanda wari utegerejwe na benshi cyane ni uwahuje Kiyovu Sports na Rayon Sports ukaba urangiye Rayon Sports itsinze Kiyovu igitego 1-0 ibifashijwemo na kapiteni wayo Rutanga Eric.
Wari umukino wari ugoye ku mpande zombi wabonaga ko buri kipe yose yakoresheje imbaraga zose ngo ibone igitego ariko bikanga kugeza ubwo iminota 90 isanzwe y’umukino yarangiye nta kipe irareba mu izamu ry’iyindi kipe nubwo wabonaga ko wari umukino uryoheye amaso ku bawureba dore ko wari wanitabiriwe n’abafana benshi.
Ku munota wa nyuma w’umukino (ni ukuvuga ku munota wa 5 w’inyongera) Rayon Sports ibonye igitego kuri coup franc yatewe neza na Rutanga Eric wari unakorewe ikosa na Nsanzimfura Keddy wa Kiyovu Sport maze ayishyiramo neza kiba kibaye igitego 1 cya Rayon Sports ku busa bwa Kiyovu sports.
Aya makipe yombi asanzwe yigamba kuba ari amakeba ashingiye ku mateka yayo ku kuba ariyo makipe akomeye amaze igihe kinini abayeho ndetse no kuba anafite abafana benshi, buri ruhande rwari rwahize gutsinda nk’uko abafana bazo bamaze iminsi bigamba mu bitangazamakuru.
Mu yindi mikino yabaye kuri iki Cyumweru, Sunrise FC yahagamye AS Kigali banganya ibitego 2-2 ibifashijwemo na Samson Babuwa.
Sunrise niyo yafunguye amazamu ibifashijwemo na Niyibizi Vedaste hanyuma AS Kigali igaruka mu gice cya kabiri yacanye umuriro mu izamu rya Sunrise ihita itsinda ibitego 2 byikurikiranya ibifashijwemo na Bishira Latif na Essombe Patrick.
Uyu kandi ni umukino wasifuwe n’abasifuzi 2 bo hagati kuko umusifuzi wo hagati, Ruzindana Nsoro yaje kuvunika ava mu kibuga, asimburwa na Nshimyumuremyi Abdallah wari uwa kane.
Mu wundi mukino wari witezwe cyane,Police FC yahuriye n’uruva gusenya I Muhanga kuko yahatsindiwe na AS Muhanga igitego 1-0 bituma itakaza umwanya wa kabiri.
Ubu urutonde rw’agateganyo ruracyayobowe na APR FC n’amanota 27 ikurikiwe na Rayon Sports n’amanota 24 inganya na Police FC ya gatatu batandukanyijwe n’ibitego bazigamye kuko Rayon Sports ifite 11 mu gihe Police FC ifite 9.Mukura VS ni iya 4 na 21.
Uko imikino yabaye kuri iki Cyumweru yagenze:
Marines FC 0-0 Mukura VS kuri Stade Umuganda I Rubavu
AS Muhanga 1-0 Police kuri Stade Muhanga
Bugesera FC 2-0 Espoir FC kuri Stade Bugesera
AS Kigali 2-2 Sunrise FC kuri Stade ya Kigali Nyamirambo (wabaye saa 15h00)
Kiyovu Sports 0-1Rayon Sports kuri Stade ya Kigali I Nyamirambo.
[team_standings 61268]
