Ramadhan yakurikiye Witakenge mu bo Minnaert agomba gukubura muri Rayon Sports
Ivan Minnert, umutoza mukuru wa Rayon Sports yamaze gusezerera Nkunzingoma Ramadhan wari umutoza w’abazamu muri iyi kipe, nyuma y’uko aba bagabo bombi hari bimwe batumvikanye ku mukino Rayon Sports yanganyijemo 2-2 na Kiyovu Sports ku munsi w’ejo.
Amakuru akomeje gucaracara avuga ko mu mukino ikipe ya Rayon Sports yaguyemo miswi na Kiyovu Sports, umutoza Yvan Minaert yashatse gusimbuza ubwo Rayon Sports yari yamaze gutsindwa ibitego 2-1, ashaka gukura mu kibuga Niyonzima Olivier ngo yinjize Girbelt Mugisha, gusa abatoza bamwungirije baramunaniza.
Ku ruhande rw’abatoza bungirije ba Rayon Sports, bumvaga ko Mugisha Francois ko ari we wava mu kibuga agasimbuzwa Nahimana Shassir mu rwego rwo kureba uko bakwishyura Kiyovu Sports, uyu mwanzuro akaba ari na wo waje gukurikizwa Master aha umwanya Shassir ku munota wa 73 w’umukino.
N’Ubwo umwanzuro w’abatoza bungirije ari wo wakurikijwe, umutoza mukuru Ivan Jacky Minaert yaje kubishwanira na Ramadhan Nkunzingoma usanzwe atoza abazamu, anamubwira ko ntacyo amaze cyane ko nta n’impamyabumenyi y’ubutoza agira.
Aya magambo akaba yarababaje Ramadhan, binarangira atagaragaye mu birori byabereye Matina kwa Freddy ubwo ikipe yose yajyaga gusangira
Uku kutagaragara muri iyi gahunda, kwatumye Yvan Minaert atangaza ko atakimukeneye, ndetse amakuru avuga ko imyitozo Rayon Sports yakoze kuri uyu wa mbere itagaragayemo uyu mutoza wahoze ari umuzamu w’ikipe y’igihugu y’u Rwanda Amavubi.
Ntacyo ubuyobozi bwa Rayon Sports buravuga kuri aya makuru, gusa ubwo Ruhago yacu dukesha iyi nkuru yageragezaga kuvugana n’umunyamabanga w’iyi kipe Itangishaka Bernard, akaba yayitangarije ko nta kinini yatangaza kuri ibyo kuko ari mu nama, gusa yirinze guhakana cyangwa kwemeza ibi.
Ati: “Ubu ntacyo nabivugaho. Ndi buze kubabwira ibyayo.”
Ramadhan Nkunzingoma, yari umwe mu batoza batatu bakoranaga na Olivier Karekezi ubwo yari yahawe Rayon Sports, aho yari kumwe na Nyakwigendera Ndikumana Hamad Katauti. Nyuma y’urupfu rwa Katauti, uyu yaje gusimbuzwa Djano Witakenge wigeze gukinira iyi kipe ndetse akanafatanya na Lomami Marcel.
Witakenge Jeannot wari umaze amezi 4 agizwe umutoza wungirije mu ikipe ya Rayon yaje ariko kuvanwa kuri uyu mwanya nyuma y’uko umutoza mukuru asabye ko ahindurirwa inshingano, ntakomeze kuba umutoza umwungiriza.
