Perezida wa Turikiya yemeza ko Mohamed Morsi yishwe n’ubutegetsi bwa Misiri

Mohamed Morsi wahoze ayoboye igihugu cya Misiri yapfuye ku wa mbere apfa azize urupfu rutunguranye rutavugwaho rumwe.

Perezida wa Turikiya, Recep Tayyip Erdogan yavuze ko Mohamed Morsi atazize urupfu rutunguranye ahubwo yishwe n’ubutegetsi bwa Misiri.

Perezida Erdogan yavuze ko Morsi yishwe bikozwe n’abategetsi ba Misiri.
Yagize ati “Ubwo yari mu rukiko yaranizwe kugeza aguye hasi mu gihe cy’iminota 20. Ntacyo abayobozi bakoze ngo bamutabare.”

Yavuze ko azakora ibishoboka byose abayobozi ba Misiri bagize uruhare mu rupfu rwa Morsi bakagezwa mu butabera mpuzamahanga, nkuko Jeune Afrique yabitangaje.

Ibiro bya Loni bishinzwe uburenganzira bwa muntu byasabye ko hafungurwa iperereza ku rupfu rwa Morsi.

Itangazo ry’Umuvugizi wa Minisiteri y’Ububanyi n’amahanga muri Misiri, ryamaganye Ubusabe bwa Loni, rivuga ko ari ugushaka gufata urupfu rusanzwe bakarugira urwa politiki.

Morsi yapfuye ubwo yari yagiye kuburana mu rukiko ruherereye mu murwa Mukuru i Cairo.

Mohaned Morsi yari inshuti ikomeye ya Perezida Erdogan ndetse nyuma y’ihirikwa rye ku butegetsi mu 2013, umubano wa Turikiya na Misiri usa nk’uwahagaze.

Mohamed Morsi yahiritswe ku butegetsi n’igisirikare mu 2013 nyuma y’imyigaragambyo yamusabaga kuva ku butegetsi yari amazeho umwaka umwe.

Amaze guhirikwa yarafunzwe, aza gukatirwa igifungo cy’imyaka 45 azira guhohotera abigaragambyaga mu mpera za 2012 n’ubugambanyi ashinjwa gukorana n’ubutasi bwa Qatar , Mohaned Morsi yari amaze imyaka 6 afungiye mu kato.