Perezida Tshisekedi yakoze ku nyama y’ibyishimo y’abarwanyi ba Wazalendo

Umutwe wa Wazalendo washimiye Perezida Tshisekedi wawushimiye akawita intwari zikunda igihugu,nyamara ushinjwa guhohotera mu buryo butandukanye Abanyekongo.

Mu itangazo rigenewe abanyamakuru ryasohowe n’umutwe wa Wazalendo kuri uyu wa gatanu tariki ya 17 Ugushyingo 2023, rivuga ko uyu mutwe ushimira perezida wa Congo, Fèlix Antoine Tshisekedi ngo kuko yavugiye kuri France 24 na RFI.

Umutwe wa wazalendo usohoye iri tangazo nyuma y’uko Tshisekedi abwiye abanyamakuru ko uyu mutwe ari abasivire b’intwali,bakunda igihugu cyabo.

Uyu mutwe wiswe intwari na Perezida Tshisekedi,ushinjwa guhohotera abavuga ururimi rw’ikinyarwanda ndetse no kubica.

Umutwe wa wazalendo muri iri tangazo wakomeje wemeza ko itegeko ryatanzwe na Perezida ryo kubashyigikira rikwiye gushyirwa mu bikorwa vuba.

Perezida Tshisekedi yabajijwe kuri kompanyi z’umutekano zo mu burengerazuba, zirimo n’iyo mu Bufaransa n’iyo muri Romania (Roumanie), zikorera muri DR Congo nk’abacancuro yemeza ko zaje kubatoza.

Ati: “Ni ukugira ngo zitwongerere ubushobozi […] Ni inzobere”. Yavuze ko abazigize babaye mu mitwe kabuhariwe y’ingabo, nk’abakomando, kandi ko “bafite inshingano yo kongerera ubushobozi abasirikare ku bintu bya nyabyo birimo kuba, ku rubuga [rw’imirwano]”.

“Bararwana?” – ni ko umunyamakuru yahise amubaza.

Ati: “Birumvikana, bagomba kuba iruhande rwacu”. Abajijwe umubare wabo, ati: “Wenda nk’igihumbi”.

Umunyamakuru yabwiye Tshisekedi ko iyo za kompanyi z’abanyamahanga zigiye kurwana ku ruhande rw’ingabo z’igihugu, ubusanzwe abo bitwa “abacanshuro”.

Tshisekedi ati: “Ni iki mwita kurwana? Jye ndababwira ko bari aho bibera, bari ku rubuga, baratoza.

“Ese umutoza w’umupira w’amaguru akinana n’ikipe ye? Kandi nyamara aba ahari, ari ku kibuga, aba areba abakinnyi be bakina, we aba atoza. Ni abatoza. Ni ibyo… Si abacanshuro.”