Perezida Samia Suluhu yakingiwe COVID-19 atanga ubutumwa bukomeye ku banyatanzania

Perezida Samia Suluhu wa Tanzania wagiye k’ubuyobozi muri Werurwe uyu mwaka yakingiwe Covid-19 nyuma y’uko igihugu cye cyemeye kwakira inkingo z’iki cyorezo no kuzitanga.

Uyu Mukuru w’Igihugu wasimbuye nyakwigendera John Pombe Magufuli yahawe urukingo rwa COVID-19, kuri uyu wa 28 Nyakanga 2021, ubwo Tanzania yatangizaga ibikorwa byo gukingira abaturage bayo mu buryo bwa rusange.

Mu muhango wo gutangiza gukingira, Perezida Samia Suluhu yasabye Abatanzania bose kwikingiza kandi ko hazaboneka izindi doze nyinshi z’inkingo.

Yavuze ko atazaganisha igihugu mu nzira yakijyana mu kaga kuko ari umubyeyi, nyirakuru w’abana na perezida.

Madamu Samia w’imyaka 61 yagize ati: “Kuva mvutse nafashe inkingo nyinshi kandi izo twahawe tukiri impinja zaraturinze iyo myaka yose, rero nta mpungenge mfite “

Uyu mukuru w’igihugu yavuze ko Tanzania yasanze atari akarwa. Ati “Ntabwo turi akarwa kandi iyo ni yo mpamvu twatangiye gukingira.”

Gutangiza iki gikorwa cyo gukingira Coronavirus muri Tanzania byabereye mu rugo rw’umukuru w’igihugu i Dar es Salaam, ahakingiriwe na minisitiri w’intebe, abakuru b’amadini n’abahoze ari abategetsi.

Uretse Perezida Samia Suluhu wafashe urukingo rwa COVID-19, hanakingiwe Minisitiri w’Intebe wa Tanzania, Kassim Majaliwa.

Uwo yasimbuye, John Magufuli wapfuye mu kwezi kwa gatatu, yakerensaga Coronavirus kandi yari yaranze inkingo zayo zakorewe mu mahanga.

Madamu Samia Suluhu yahinduye ibintu afata undi murongo, asaba rubanda gukurikiza amabwiriza yo kwirinda iki cyorezo.

Mu minsi ishize, Tanzania yakiriye doze miliyoni imwe y’inkingo za Johnson & Johnson zivuye mu mugambi wa Covax wo kugeza izi nkingo ku bihugu bikennye.

Yanditswe na Vainqueur Mahoro