30/10/2018 Leo Hakizimana

Perezida Museveni agiye gushyira hanze Album y’indirimbo ze izasiga agahigo ku Isi

Hemejwe amakuru yari amaze iminsi azenguruka ku mbuga nkoranyambaga bavuga ko Perezida Museveni ari kwitegura igitaramo cyo kumurika umuzingo (Album) w’indirimbo ze 2 , ibintu bidasanzwe ku Isi.

Amakuru y’uko Museveni ari kwitegura gushyira hanze Album y’indirimbo ze, yashyizwe hanze na Balaam Baruagahare utegura ibitaramo by’abahanzi batandukanye muri Uganda, icyo gihe yavuze ko ari gutegura Album ya Perezida Museveni ubwo yari abajijwe impamvu atari we uri gutegura igitaramo cy’inshuti ye Bobi Wine.

Chimpreports yanditse ko Balaam yemeje ko bidasubirwaho Perezida Museveni ari kwitegura gushyira hanze iyi Album izaba ibaye iya mbere ku Isi imuritswe ifite indirimbo 2 gusa. Iyi Album igizwe n’indirimbo ‘Bazzukulu Bange Mukwate Empola’ n’indi ye nshya yitwa ‘None-Stop’. Biteganyijwe ko azayimurika mbere y’amatora y’umukuru w’igihugu azaba muri Uganda mu 2021 uretse ko aho bizabera hatari hamenyekana.

Balaam kandi yemeje ko kwinjira muri iki gitaramo ari ubuntu ndetse ibintu byose bizatangwa na Museveni harimo amashiringi azishyura abazategura igitaramo. Amashusho y’izi ndirimbo ze 2 azafatirwa mu rwuri rwe ruri i Rwakitura.

Museveni yagaragaje ko burya akunda muzika mu 2010 ubwo yashyiraga indirimbo ye hanze ya mbere mu 2010 yise ‘Mpenkoni’, iyi ndirimbo yarakunzwe ku buryo budasanzwe muri Uganda.

Muri Kanama uyu mwaka, Perezida Museveni yongeye kwerekana ko burya muzika ari ibintu bye ubwo yajyaga mu gitaramo cya Bebe Cool cyari cyabereye Kololo, uretse ibyo aherutse no kwakira mu biro bye umuraperi ukomeye wo muri Amerika Kanye West wahinduye izina akaba yitwa Ye n’ Kim Kardashian.

Umuntu yakwibaza ni ba ubwo aba bombi bahuriraga i Entebbe, Museveni yarahaye Kanye West indirimbo ze cyangwa se akazimwumvisha!