Perezida Kagame yasubije Ramaphosa wise RDF inyeshyamba

Perezida w’u Rwanda, Paul Kagame yavuguruje Cyril Ramaphosa wa Afurika y’Epfo, wise Ingabo z’u Rwanda (RDF) inyeshyamba, ndetse akavuga ko zagize uruhare mu rupfu rw’abasirikare be bari mu butumwa muri Repubulika Iharanira Demokarasi ya Congo, RDC.

Umukuru w’Igihugu yabwiye Ramaphosa ko RDF ari ingabo aho kuba inyeshyamba nk’uko uwo Mukuru w’Igihugu yabitangaje, ndetse anamugaragariza ko niba Afurika y’Epfo ishaka ubushotoranyi ku Rwanda na rwo rwiteguye guhangana n’ibyo bibazo mu buryo bukwiriye.

Ni ubutumwa Umukuru w’Igihugu yatanze ku wa 29 Mutarama 2025, ubwo yasubizaga ubutumwa bwa Perezida Ramaphosa, watangaga ihumure ku miryango y’ababuze ababo bari abasirikare b’igihugu cye, anagerageza gusobanura mu buryo bwe uko ibintu bimeze mu Burasirazuba bwa Congo.

Abinyujije kuri X, Ramaphosa yavuze ko nyuma y’imirwano yo mu Burasirazuba bwa RDC, igihugu ayoboye cyabuze abasirikare 13 bari mu “butumwa bw’amahoro”.

Ati “Iyi mirwano yatangijwe n’umutwe witwaje intwaro wa M23 ndetse n’inyeshyamba z’Ingabo z’u Rwanda, RDF, aho bihanganye n’Ingabo za Congo, FARDC. Bagabye ibitero ku ngabo ziri mu butumwa bw’amahoro bwa SADC muri RDC buzwi nka SAMIDRC.”

Yavuze kandi ko ngo ibyo bitero byagabwe kuri SAMIDRC byatumye hapfa abandi basirikare bo mu bihugu biri muri ubwo butumwa nk’abo muri Malawi, Tanzania n’aba MONUSCO, agaragaza ko bazirikana abo babuze ubuzima ari na ko yihanganisha abo mu miryango y’ababuze ababo.

Perezida Ramaphosa yagaragaje ko aho ibirindiro by’ingabo zabo biri, ni ukuvuga mu bice bya Sake na Goma, ibintu bigikomeye cyane ndetse biri guhindagurika umunota ku wundi bitunguranye, ku buryo bigoye kumenya uko ejo hazaza hazaba hameze.

Icyakora yijeje ko inzego z’umutekano muri Afurika y’Epfo n’izo muri SAMIRDC ziri gukora uko zishoboye kugira ngo ingabo ziri muri ubwo “butumwa bw’amahoro” zihabwe ibikoresho byose bisabwa muri ibi bihe by’amage kuri zo.

Ati “Ntabwo Ingabo za Afurika y’Epfo ziri mu Burasirazuba bwa RDC ku bwo gushoza intambara ku gihugu runaka. Ziri muri RDC mu murongo wa SADC na Loni wo gushyira imbaraga mu bikorwa byo kugarura amahoro arambye no kurinda abaturage bugarijwe n’imirwano muri RDC.”

Ramaphosa yavuze ko igihugu cye cyemeranya n’umurongo wafashwe n’Akanama ka Loni gashinzwe umutekano ku Isi, kasabye ko hahagarikwa imirwano, M23 igasubiza ibice yigaruriye, imitwe ikomoka mu bihugu by’amahanga ikava muri RDC, ariko hakanasubukurwa ibiganiro hashingiwe ku masezerano ya Nairobi.

Perezida Ramaphosa kandi yagaragaje ko ubusugire bwa RDC bugomba kubahwa nk’uko Loni ibiteganya, asaba impande zihanganye gushakira ibisubizo by’ibibazo binyuze mu nzira ya dipolomasi hisunzwe amasezarano ya Luanda.

Perezida Ramaphosa:Umubeshyi kabombo

Mu gusubiza ubutumwa bw’uyu muperezida wo muri Afurika y’Epfo, Perezida Kagame yamwibukije ko muri iki cyumweru bombi baganiriye inshuro ebyiri harimo n’ikiganiro cyabaye ku wa 29 Mutarama 2025, byose bigaruka ku mutekano wo mu Burasirazuba bwa RDC.

Icyakora Umukuru w’Igihugu yavuze ko ibyavuzwe mu itangazamakuru n’abayobozi ba Afurika y’Epfo harimo na Perezida Ramaphoza ubwe harimo kugoreka ukuri kw’ibihari, kwibasira kugambiriwe ndetse n’ibinyoma.

Yavuze ko niba ibyavugiwe mu biganiro byihariye bihabanye kure n’ibyagaragarijwe ku karubanda, bigaragaza neza uburyo ibibazo biri gufatwa, atanga umucyo ku byaganiriweho, ariko anatanga isomo kuri uyu muyobozi.

Ati “RDF ni igisirikare ntabwo ari inyeshyamba. SAMIDRC ntabwo ari ingabo ziri mu butumwa bw’amahoro ndetse nta mwanya zifite muri ibi bintu.”

Perezida Kagame yavuze ko SAMIDRC ari ingabo zahawe uruhushya na SADC, kugira ngo zifashe RDC kurwanya abaturage bayo, ifatanyije n’imitwe y’abajenosideri nka FDLR, ihora ishaka guhungabanya umutekano w’u Rwanda, na yo ubwayo ihora itera ubwoba ko izatera u Rwanda.

Ati “SAMIDRC yasimbuye Ingabo z’Umuryango wa Afurika y’Iburirazuba, zari mu butumwa bwa nyabwo bwo kugarura amahoro, ibyanatumye inzira y’ibiganiro idakomeza.

Perezida Ramaphosa ntiyigeze anatanga “umuburo” wo mu buryo ubwo ari bwo bwose, keretse niba yaba yarabutanze mu rurimi gakondo rwe ntumva. Yasabye ubufasha bwo kugira ngo ingabo za Afurika y’Epfo zibone amashanyarazi, ibiribwa n’amazi, ibintu twemeye kubatumikira.”

Ku bijyanye n’ibyo Perezida Ramaphosa yatangaje by’uko abasirikare b’igihugu cye bishwe “ku bw’ibitero M23 na RDF byabagabyeho” Perezida Kagame yagaragaje ko bisa nko kwinyuramo, kuko mu biganiro abo bombi bagiranye, uyu muyobozi wa Afurika y’Epfo we ubwe yiyemereye ko bishwe na FARDC aho kuba M23.

Ati “Perezida Ramaphosa nyampamirije ko M23 itigeze yica ingabo za Afurika y’Epfo, ahubwo bishwe na FARDC.”

Perezida Kagame yavuze ko niba Afurika y’Epfo yumva ishaka kugira uruhare mu bikorwa byo kugarura amahoro, ari byiza ariko ayibutsa ko itari mu mwanya wo kwiha inshingano zo kugarura amahoro cyangwa uwo kuba kuba umuhuza.

Ati “Kandi niba Afurika y’Epfo yifuza ubushotoranyi, u Rwanda na rwo umunsi runaka ruzabyitaho muri ubwo buryo.”

Ku wa 25 Mutarama 2025 ni bwo Igisirikare cya Afurika y’Epfo, SANDF cyatangaje ko abasirikare bacyo baguye mu mirwano yari ihuje M23 n’Ihuriro ry’ingabo za Repubulika Iharanira Demokarasi ya Congo, RDC.

Ni imirwano yari yabereye mu Mujyi wa Sake uherereye muri Teritwari ya Masisi no mu bice byegereye Umujyi wa Goma muri Teritwari ya Nyiragongo kuva ku wa 23 Mutarama 2025.

Kugeza ubu mu Burasirazuba bwa RDC intambara isa n’iyahosheje ugereranyije n’uko mu minsi mike ishize byari bimeze, nyuma y’uko M23 ibohoye Umujyi wa Goma, ubu ikaba ari yo iri kugenzura ibikorwa bitandukanye muri uwo mujyi.