Perezida Kagame yakiriye umuyobozi wa NBA Africa hamwe n’uwa BAL
Kuri uyu wa Gatatu, itariki ya 20 Werurwe, Perezida Paul Kagame, yakiriye umuyobozi mukuru wa NBA muri Afurika, Clare Akamanzi na Perezida wa Basketball Africa League (BAL), Amadou Gallo Fall i Kigali.
Nk’uko byatangajwe n’ibiro bya Perezida Kagame, baganiriye ku bufatanye bwa BAL n’u Rwanda ndetse no ku mikino ya nyuma ya BAL 2024 iteganijwe kubera i Kigali kuva ku itariki ya 24 Gicurasi kugeza ku ya 1 Kamena.
Visit Rwanda ni umufatanyabikorwa mu gushinga no kwakira imikino ya BAL binyuze mu masezerano y’imyaka myinshi.
Binyuze muri ubwo bufatanye, u Rwanda rwakiriye amarushanwa ya mbere ya Basketball Africa League muri BK Arena, inzu y’imikino iri ku rwego mpuzamahanga, inshuro eshatu za mbere muri 2021, 2022, na 2023. U Rwanda kandi ruzakira imikino y’ijonjora rya nyuma ya 2024 na finale ku itariki ya 24 Gicurasi kugeza ku ya 1 Kamena.
Amajonjora ya mbere ya BAL 2024 yiswe Karahari Conference yabereye muri Afurika y’Epfo muri SanBet Arena yashojwe ku itariki ya 17 Werurwe, FUS Rabat iyegukanye mu gihe Petro de Luanda wa Angola yaje ku mwanya wa kabiri naho Cape Tigers yo muri Afurika y’Epfo iza ku mwanya wa gatatu.
Akurikira yiswe Nile Conference azabera mu Misiri kuva ku itariki ya 19-27 Mata. Nile Conference ibarizwamo amakipe ya Al Ahly (Misiri), Al Ahly (Libya), Bangui Sporting Club (Repubulika ya Centrafrique) na City Oilers (Uganda).
Abahagarariye u Rwanda, APR, babarizwa muri Sahara Conference, aho imikino yabo izatangira kuva ku itariki ya 4-12 Gicurasi muri Senegal. Iri tsinda kandi ribarizwamo igihangange cyo muri Tunisia, US Monastir ndetse n’amakipe yayikurikiye mu irushanwa riheruka rya BAL 2023; AS Douanes yo muri Senegal na Rivers Hoopers yo muri Nigeria.
Amakipe abiri ya mbere muri buri conference hamwe n’amakipe abiri meza yegukanye umwanya wa gatatu aturutse hirya no hino muri conference eshatu azerekeza muri BK Arena i Kigali mu mikino ine y’imbuto ikurikirwa n’imikino umunani, irimo imikino yo gusezerera hamwe na finale kuva kuwa 24 Gicurasi kugeza kuwa 1 Kamena.
