Perezida Donald Trump yahishuye iby’urupfu rw’umuhungu wa Osama Bin Laden

Perezida wa Leta zunze ubumwe za Amerika Donald Trump yamaze amatsiko abamaze iminsi bibaza niba koko Hamza Bin Laden,umuhungu wa Osama Bin Laden yaba yarishwe.

Donald Trump yavuze ko Hamza Bin Laden yishwe koko akaba yaraguye mu bikorwa bya Amerika byo kurwanya iterabwoba mu karere ka Afghanistani/Pakistani”.

Muri Kanama 2019, ibitangazamakuru byo muri Amerika – bisubiramo amagambo y’abakora mu butasi – byatangaje ko yapfiriye mu gitero cy’indege.

Mu myaka ibiri ishize, Amerika yari yatangaje ko imufata nk’ukora iterabwoba ku rwego rw’isi.

Yabonwaga ahanini nk’ushobora gusimbura se. Byibazwa ko yari afite hafi imyaka 30 y’amavuko. Yari yarasabye ko Amerika igabwaho ibitero ndetse no ku bindi bihugu bimwe.

Mu itangazo rigufi ryasohowe n’ibiro bya perezida w’Amerika bya White House, Bwana Trump yagize ati:

“Hamza Bin Laden, wari umuyoboke wo ku rwego rwo hejuru wa al-Qaeda akaba n’umuhungu wa Osama Bin Laden, yiciwe mu gikorwa cya Leta Zunze Ubumwe z’Amerika cyo kurwanya iterabwoba mu karere ka Afghanistani/Pakistani”.

Iryo tangazo ntiryavuze igihe yiciwe.

Muri Gashyantare 2019 leta y’Amerika yari yatanze miliyoni imwe y’amadolari ku muntu wese waba afite amakuru yatuma afatwa.

Hamza Bin Laden yabonwaga nk’uri gutera imbere mu bakuriye al-Qaeda.

Muri Kanama 2019, byari byatangajwe ko yiciwe mu gikorwa cya gisirikare cyabaye mu myaka ibiri ishize kandi ko Amerika yabigizemo uruhare, ariko itariki n’isaha nyirizina yiciwe ntibizwi.