Pepe wamamaye muri Real Madrid yasheshe amasezerano yari afitanye na Besiktas
Kepler Lima, myugariro wamamaye muri Real Madrid nka Pepe yamaze gusesa amasezerano yari afitanye na Besiktas yo mu gihugu cya Turkiya yakiniraga.
Nta tangazo ryemeza aya makuru rirasohoka, gusa ikinyamakuru Marca cyegamiye kuri Real Madrid kivuga ko uyu myugariro wari ufitanye na Besiktas amasezerano azarangira muri Kamena 2019 afite uburenganzira busesuye bwo gusinyira indi kipe.
Amakuru aturuka mu gihugu cya Turkiya avuga ko Besiktas Pepe yakiniraga yugarijwe n’ibibazo by’amikoro, bityo ikaba yarananiwe guhemba abakinnyi bayo bahabwa agatubutse barimo na Pepe.
Pepe w’imyaka 35 y’amavuko, akomoka mu gihugu cya Portugal. Yari amaze gukinira iyi kipe imikino 17 ya shampiyona muri uyu mwaka w’imikino, akaba yarayitsindiye ibitego 5. Bitatu muri ibi bitego yabitsindiye mu marushanwa y’imbere muri Turkiya, mu gihe ibindi bibiri yabitsinze ku ruhando rw’u Burayi.
Muri rusange kuva yagera muri Turkiya avuye muri Real Madrid, Pepe yakiniye Besiktas imikino 53 aho yayitsindiyemo ibitego birindwi. Yanataze kandi imipira itatu yavuyemo ibitego.
