Peace Cup: AS Kigali yaturutse inyuma itsinda Gasogi, Police FC itsindira Etincelles i Rubavu

Ikipe ya AS Kigali yatsinze Gasogi United ibitego 2-1 mu mukino ubanza wa 1/4 cy’irangiza cy’igikombe cy’amahoro, Police FC ijya gutsindira Etincelles FC i Rubavu ibitego 2-1.

AS Kigali yamaze kwemera kwihuza na Kiyovu SC mu mwaka w’imikino utaha, yari yakiriye Gasogi United mu mukino ubanza wa 1/4 cy’irangiza wabereye kuri Stade ya Kigali i Nyamirambo.

Gasogi United yakinnye neza igice cya mbere cy’umukino, yafunguye amazamu ku munota wa 24 ibifashijwemo na Rugamba Jean Baptiste. Ni kuri Coup-Fran cyari itewe na Twagirimana Fulgence, umupira urenze ba myugariro ba AS Kigali Rugamba arasimbuka awukozaho ikirenge ujya mu rucundura.

Igice cya mbere cy’umukino cyarangiye Gasogi United y’umutoza Romami Marcel iri imbere n’igitego kimwe ku busa bwa AS Kigali.

Mu gice cya kabiri, AS Kigali yongereye imbaraga mu busatirizi iha umwanya Cyitegetse Bogard na Nova Bayama binjiye basimbura Murengezi Rodrigue na Ngama Emmanuel.

Izi mpinduka umutoza Mateso yakoze zamufashije cyane, birangira yishyuye igitego yari yatsinzwe ndetse anabona n’icya kabiri cy’insinzi.

Abanyamujyi bishyuye ku munota wa 60 w’umukino babifashijwemo na Cyitegetse Bogard, ku mupira yari ahinduriwe na Nshimiyimana Marc Govin.

Myugariro Bishira Latif yatsindiye AS Kigali igitego cy’insinzi ku munota wa 85 w’umukino, ku mupira wari uturutse kuri Coup-Franc yari itewe na Nova Bayama.

Mu wundi mukino, Police FC yagiye gutsindira Etincelles FC i Rubavu ibitego 2-0. Imikino ibanza ya 1/4 cy’igikombe cy’amahoro izakomeza ku munsi w’ejo; Rayon Sports yakira Gicumbi FC, mu gihe Intare FC igomba kwakira Kiyovu Sport.