Online Fan Club ya APR FC yatsinze Gikundiro Forever ya Rayon Sports
Mu mukino w’ishiraniro wari utegerejwe n’abatari bake, ikipe y’abafana ba APR FC bibumbiye muri Fan Club ya Online batsinze ibitego 2-1 aba Rayon Sports bibumbiye mu ya Gikundiro Forever, mu mukino wa gicuti wahuje aba bafana kuri iki cyumweru.
Ni umukino wabereye ku kibuga cya FERWAFA giherereye inyuma ya Stade Amahoro i Remera. Online Fan Club ya APR FC ni yo yawuteguye mu rwego rwo kubaka umubano hagati y’abafana b’amakipe yombi.
Ikipe ya Online yabonye igitego cya mbere ku munota wa 35 w’umukino gitsinzwe na rutahizamu witwa Shema. Iki gitego cy’iyi kipe y’abafana ba APR FC ni na cyo cyajyanye amakipe yombi mu kiruhuko cy’igice cya mbere.
Nyuma y’iminota mike igice cya kabiri cy’umukino gitangiye, Online Fan Club yaje kubona igitego cya kabiri. Ni igitego cyatsinzwe n’umufana witwa Simeon.
Ikipe ya Gikundiro Forever yabonye impozamarira mu minota ya nyuma y’umukino, igitego cyatsinzwe n’uwitwa Isiaka.
Nyuma y’uyu mukino, ikipe ya Gikundiro Forever yashinje Online Fan Club gukinisha abakinnyi bo mu kiciro cya kabiri aho gukinisha abanyamuryango bayo. Yavuze kandi ko igitego 1 yatsindiye hanze gihagije, bityo ikaba yiteguye kwigaranzura Online mu mukino uzongera kubahuza.
