Nyuma yo kugaragaza impano yo kwigana ingendo yaba nyampinga,Miss Iradukunda Liliane yarabatunguye-AMAFOTO
Nyuma yo kwifata amashusho bigana uburyo ba nyampinga bagenda maze agatangira gusakara ku mbuga nkoranyambaga zitandukanye Miss Rwanda 2018 Liliane Iradukunda yatunguye abana bakiri bato bafashwe ayo mashusho asangira nabo kuri Pasika.
Aba bana bo mu murenge wa Muhima akarere ka nyarugenge bamenyekanye mu mashusho yahererekanywe cyane ku mbuga nkoranyambaga zitandukanye bigana intambuko ya ba Miss bakoresha ubwo baba bari mu irushanwa.
Miss Rwanda yavuze ko akimara kubona ayo mashusho yabo yahise agira ikifuzo cyo kubonana na bo ndetse akanaganira nabo arinayo mpamvu Amaze kumenya aho batuye, ku mugoroba wo kuri Pasika, Miss Iradukunda Liliane yagiye ku Muhima aganira na bo, barasangira, barishimana bongera no kumwereka impano na bo bafite.
Miss Liliane yagize ati “Nahisemo ko twasangira Pasika nkabaganiriza mu buryo bwo kubongerera imbaraga zo kumva ko ubwo bushake bafite bwazabagirira akamaro bamaze gukura.”
Bamwe muri aba bana bavuga ko bifuza gutera ikirenge mu cya Nyampinga, bagaragaje ibyishimo byo gusangira n’uyu mukobwa w’imyaka 18 watowe nka Nyampinga w’u Rwanda 2018.
