Nyamashake: Arahigishwa uruhindu kubera kwica igitera

24/09/2024 Sakade Keros

Inzego z’umutekano mu karere ka Nyamasheke zikomeje guhigisha uruhindu Nsabimana Jean w’imyaka 32 utuye mu kagari ka Cyimpindu, Umurenge wa Kirimbi, aho akekwaho kwica Igitera cyari kigeze mu Murenge wabo kivuye muri Pariki y’Igihugu ya Nyungwe.

Bivugwa ko iyo nyamaswa yavuye muri Pariki ku Cyumweru tariki ya 22 Nzeri 2024, ihingukira mu Mudugudu wa Uwamugisha, Akagari ka Cyimpindu, Umurenge wa Kirimbi, abaturage bayibonye batangira kuyirukankana n’ imijugujugu ivanzemo n’ amabuye ari nako bayivugiriza akaruru ngo bayitiranyije n’ impyisi.

Umwe mu baturage b’uwo Mudugudu Avuga ko bayikuye mu Mudugudu wa Uwamugisha bayigeza mu wa Rugeregere bayihabije. Ati: “Bayigejeje muri Rugeregere bayicisha inyuma y’urugo rw’Umukuru w’Umudugudu bayirukankaho induru ku musozi zabaye nyinshi. Mudugudu wa Rugeregere yarayibatesheje isimbuka umukingo igwa mu bisheke biri munsi y’umuhanda. Mu kanya gato Gitifu w’Akagari n’abakozi ba Pariki ya Nyungwe bahageze basanga yapfuye.”

Umuturage w’umudugudu wa Rugeregere iyi nyamaswa yavuyemo na we ati: “Dukeka ko ari abo baturage bayishe, ku isonga hari uriya Nsabimana Jean n’ubu ugishakishwa n’inzego z’umutekano kuko ni we wari uri imbere ayirukaho n’imijugujugu n’amabuye ayitera, induru yayihaye umunwa.”

Abo baturage bavuga ko iki gitera cyasagariwe kuko ubusanzwe ngo kitaryana nta n’uwo cyanduranyaho, ndetse bakaba bavuga ko nta n’ umuturage watse ko yamwoneye imyaka.

Umunyamabanga Nshingwabikorwa w’Akagari ka Cyimpindu Mukakayumba Cécile, avuga ko ku bufatanye n’inzego z’umutekano, Nsabimana Jean akomeje gushakishwa ngo abazwe ibyo yakoze, ndetse anavuge abandi bari kumwe kuko ari we Umukuru w’Umudugudu wa Rugeregere yabashije kumenyamo.

Avuga ko kuyica ari ikosa rikomeye bakoze kuko hari n’izindi zigeze kuhaza, babwira abakozi ba Pariki baza kuzitwara uyu muyobozi kandi yasabye abaturage ko igihe babonye inyamaswa yo muri Pariki ibagezeho, aho kuyirukankaho cyangwa kuyica bahamagara abashinzwe kurinda Paliki bakaza kuyitwara, haba hari ibyo yangije bikarihwa ariko igatekana.

Share on Facebook