Nsabimana Aimable wakiniraga APR FC yerekeje mu Buhinde
Myugariro Aimable Nsabimana wakiniraga ikipe ya APR FC yamaze kwerekeza mu kipe ya Minerva Punjab iheruka kwegukana igikombe cya shampiyona y’ikiciro cya mbere mu gihugu cy’Ubuhinde.
Aimable wageze muri APR FC muri 2016 akubutse muri FC Marines y’i Rubavu, yafashe indege mu ijoro ryakeye aho yari aherekejwe na bamwe mu bagize umuryango we barimo nyina umubyara cyo kimwe n’inshuti ze za hafi zirimo Master ukinira Rayon Sports.
Amakuru avuga ko kuba uyu musore yafashe ikemezo cyo kugenda atari uko atifuzwaga na APR FC, ahubwo ngo impande zombi zananiwe kumvikana ku mafaranga yashoboraga gutuma uyu musore yongera amasezerano muri iyi kipe y’ingabo z’igihugu.
Aimable watsindiye APR FC ibitego 8 muri shampiyona y’umwaka ushize, ngo yakaga APR miliyoni 10 z’amanyarwanda ngo abe yakongera amasezerano, APR FC yo ikamuha miliyoni 8 bityo miliyoni 2 zituma atabasha kongera amasezerano.
Iyi kipe ya Minerva Punjab yashinzwe muri 2005, ikabarizwa mu majyaruguru y’ubuhinde. Mu myaka 2 ishize iyi kipe yakinaga ikiciro cya kabiri cy’Ubuhinde, gusa muri 2016/17 yabonye amahirwe yo kuzamuka mu kiciro cya mbere.
Nyuma y’umwaka umwe igeze mu kiciro cya mbere, yegukanye igikombe cya shampiyona y’Ubuhinde giheruka, ibi bikaba binayiha uburenganzira busesuye bwo gukina Champions League yo ku mugabane wa Asia.
