Nimwiza Meghan ni we ubaye Miss Rwanda 2019
Nimwiza Meghan niwe ubaye Nyampinga w’u Rwanda 2018 ahigitse abandi bakobwa 15 bari bahanganiye iri kamba, akaba asimbuye Iradukunda Lilianne wari umaranye umwaka iri kamba.
Ku mugoroba wo kuri uyu wa 26 Mutarama 2019 nibwo hasojwe irushanwa rya Nyampinga w’u Rwanda ryari rimaze hafi ukwezi.
Ryatangiye hatorwa abakobwa 37 baturutse mu gihugu cyose, nyuma hakurwamo 20 bagiye mu mwiherero, mu mwiherero hirukanwa abakobwa 5 hanyuma 15 bonyine aba aribo bagera kuri final.
Aba bakobwa 15 banyuze imbere y’akanama nkemurampaka, babazwa ibibazo batomboraga , babazwaga mu Kinyarwanda n’Icyongereza.
Nyuma haje gutangwa amanota hasigara abakobwa batanu (Uwihirwe Yasipi Casimir(No 21), Gaju Anita (No. 35), Uwase Sangwa Odille (No. 16), Kabahenda Ricca Michaella (No. 09) na Nimwiza Meghan (No. 32)) barongera babazwa ibibazo bitadukanye mu rurimi rw’icyongereza.
Nyuma akanama nkempurampaka kagiye kwiherera nyuma kaza gutangaza ko Nimwiza Meghan winjiye muri Miss Rwanda ahagarariye umujyi wa Kigali ari we wagizwe Nyampinga w’u Rwanda bitungura benshi dore ko atari mu bakekwaga. Nimwiza Meghan nawe byamugoye kubyakira dore ko yagize ikiniga akavuga ko yabuze icyo avuga.
Mwiseneza Josianne wifurijwe na benshi kuba Miss Rwanda yabaye Miss wakunzwe cyane (Miss Popularity).
Uwahirwe Yasipi Casmir yabaye igisonga cya mbere cya Miss Rwanda 2019 ahabwa miliyoni imwe y’amafaranga y’u Rwanda (1,000,000 Frw) mu gihe Uwase Sangwa Odile wabaye igisonga cya kabiri yahawe ibihumbi magana atanu by’amafaranga y’u Rwanda (500,000 Frw).
Nimwiza Meghan ahembwe imodoka nshya, akazajya ahabwa umushahara w’amafaranga ibihumbi 800 ku kwezi n’ibindi bitandukanye birimo imyambaro, amavuta,… Azitabira kandi irushanwa rya Nyampinga w’Isi rizaba mu mpera z’umwaka wa 2019.
