Nigeria: Boko Haram yahitanye ingabo z’igihugu zirenga 70
Kuwa Mbere tariki ya 23 Werurwe 2020, umutwe witerabwoba wa Boku Haram wateze umutego ingabo zirenga 70 za Nigeria uzifata munyago muri leta ya Borno.
Aya makuru dukesha Punch News avuga ko ingabo z’igihugu zari mu ikamyo ya gisirikare, ziturutse mu gace ka Maiduguri, zigiye kugaba igitero ku barwanyi ba Boko Haram.
Bageze mu nzira basanga aba barwanyi babateze bitwaje imbunda ziremereye za RPG maze babamishaho ibisasu. Umwe mu basirikare mu ngabo za Nigeria yagize ati: “Ni igihombo gikomeye, abasirikare barenga 70 baguye mu mutego, babura ubuzima.”
Iki gitangazamakuru kivuga ko hafi y’abasirikare bari muri iyi kamyo bapfuye. Abakomeretse n’abandi bake batagize icyo baba, bafashwe mpiri n’aba barwanyi. Imirambo y’aba basirikare yamaze gukurwa ayo barasiwe ndetse ngo hari cyo kubohoza izi ngabo z’igihugu zatwawe.
Umutwe wa Boko Haram wavukiye muri Maiduguri mu 2002. Ukunze kugaba ibitero no gutega ingabo z’igihugu, ugashimuta abaturage ndetse ukinjiza urubyiruko mu gisirikare. Mu majyaruguru y’uburasirazuba ukunze kwibasira,wagize uruhare mu rupfu rw’abantu barenga 36000, abandi hafi miliyoni ebyiri bava mu byabo.
