Niba Irani ishaka kurwana na Amerika, ibyo bivuze kurangira kwayo -Perezida Donald Trump

Perezida wa Leta Zunze Ubumwe z’Amerika Donald Trump yaburiye Irani bikomeye, avuga ko Irani yaba igeze ku mpera za yo mu gihe yaba itangije intambara hagati yayo na Amerika.

Abinyujije kuri Twitter Trump yagize ati: “Niba Irani ishaka kurwana, ibyo bivuze kurangira kwayo”.

Yongeyeho ati: “Ntuzahirahire na rimwe ushyamirana n’Amerika ukundi!”

Mu minsi ya vuba ishize, Amerika yohereje ubundi bwato n’indege by’intambara mu karere k’ikigobe.

Ariko ubu butumwa bwa Trump bwo ku rubuga rwa Twitter, bwahinduye imvugo yari imaze igihe igaragaza ko intambara hagati y’ibihugu byombi idashoboka.

Ibi Perezida Trump yabitangaje mu gihe hagati y’ibihugu byombi, bigaragariza amahanga ko nta nakimwe muri byo gikeneye intambara.

Mu kiganiro giherutse gutangazwa na televiziyo Fox,Trump yasezeranyije ko atazareka ko Irani icura intwaro kirimbuzi za nikleyeri, ariko avuga ko nta ntambara na Irani ashaka.

Yagize ati: “Ntabwo ndi umuntu ushaka intambara, kuko intambara izahaza ubukungu, [kandi] intambara ihitana abantu by’umwihariko…”

Irani na yo yacubije impungenge zuko haba intambara, mu gihe ubushyamirane bukomeje gukara. Ku wa gatandatu, minisitiri w’ububanyi n’amahanga wa Irani yavuze ko iki gihugu kidafite amashyushyu y’intambara.

Mohammad Javad Zarif yavuze ko Irani itifuza intambara ariko kandi ko nta n’umwe ushobora guhangara Irani uko yishakiye muri aka Karere.

Yakomeje avuga ko icyiza ari uko na Amerika ubwayo yakubaha Iran aho kugira ngo Perezida Trump akore ibikorwa asa nushaka kumera nka bimwe mu bikomerezwa nka Alexander [the Great], Genghis [Khan] n’abandi bashotoranyi bagerageje kugeraho bikabananira”..