NBA: Toronto Raptors yegukanye igikombe cya shampiyona itsinze Golden State(Amafoto)
Ikipe ya Toronto Raptors yegukanye igikombe cya shampiyona ya NBA bwa mbere mu mateka yayo, nyuma yo gutsinda ku mukino wa nyuma Golden State Warriors yari imaze igihe yarigaruriye iyi shampiyona.
Raports y’umutoza Nick Nurse, yegukanye iki gikombe nyuma yo gutsinda Worriors inzinzi enye kuri ebyiri.
Ni umukino iyi kipe yasabwaga gutsinda kugira ngo ihite yegukana igikombe cya shampiyona hatabayeho umukino wa karindwi.
Mu rukerera rwo kuri uyu wa gatanu aya makipe yombi yari yahuriye mu mukino wa gatandatu, warangiye ikipe ya Raptors itsindiye Warriors imbere y’abafana bayo amanota 114-110. Agace ka mbere karangiye Raptors ifite amanota 33 kuri 32 ya Warriors, aka kabiri na bwo igatsinda ku manota 27 kuri 25 ya Golden State.
Ikipe ya Warriors yegukanye agace ka gatatu ku manota 31 kuri 26 ya Raptors, mbere y’uko Toronto yegukana agace ka nyuma ku manota 28 kuri 22 ya Warriors.
Muri rusange Golden State yakoze ibishoboka byose ngo ibe yatsinda uyu mukino, gusa icyuho cya Kevin Durant utakinnye uyu mukino kubera imvune kiyikoraho. Klay Thompson byagaragaraga ko ahetse iyi kipe na we yagize imvune, biba ngombwa ko atarangiza uyu mukino. Uyu musore yavunitse amaze gutsinda amanota 30.
Ikipe ya Raptors yegukanye iki gikombe ahanini ibifashijwemo n’abasore bayo bafite ubunararibonye, barimo Pascal Siakam na Kyle Lowry batsinze amanota 26 kuri buri umwe, mu gihe VanVleet and Kawhi Leonard buri umwe yatsinze amanota 22.
Uko Toronto Raptors na Golden State zatsindanye mu mikino itandatu zari zimaze gukina.
- Umukino wa mbere: Warriors 109-118 Raptors
- Umukino wa kabiri : Warriors 109-104 Raptors
- Umukino wa gatatu: Raptors 123-109 Warriors
- Umukino wa kane: Raptors 105-92 Warriors
- Umukino wa gatanu: Warriors 106-105 Raptors
- Umukino wa gatandatu: Raptors 114-110 Warriors
