Mukura VS yongeye kubabaza Rayon Sports, ikuraho amateka yari amaze imyaka 6
Umukino usoza umunsi wa kabiri wa shampiyona y’ikiciro cya mbere wari utegerejwe n’abatari bake hagati ya Rayon Sports na Mukura Victory Sports, warangiye ikipe ya Mukura itsinze Rayon Sports ibitego 2-1 ikomeza kurya insyataburenge ikipe ya APR FC.
Ni umukino wabereye kuri Stade ya Kigali i Nyamirambo.
Ni umukino by’umwihariko Rayon Sports yaje gukina ifitiye Mukura Victory Sports umujinya, nyuma yo kubabazwa n’iyi kipe y’i Huye ikayitwara igikombe cy’Amahoro.
Umukino w’uyu munsi watangiye Mukura Victory Sports iri imbere ya Rayon Sports, birangira inayibonyemo ibitego 2 byose byinjiye mu gice cya mbere cy’umukino. Ni ibitego byombi byatsinzwe na rutahizamu Ndizeye Innocent wageze muri iyi kipe avuye mu Magaju y’i Nyamagabe.
Ibi bitego bya Innocent ni byo byajyanye amakipe yombi mu kiruhuko.
Rayon Sports yagarukanye imbaraga nyinshi mu gice cya kabiri cy’umukino, iza kubona igitego ku munota wa 53 w’umukino. Ni igitego cyatsinzwe na Kapiteni Manzi Thiery.
Rayon Sports yakomeje gusatira cyane ikipe ya Mukura gusa uburyo yagiye ibona abasore bayo bakabupfusha ubusa.
Byabaye ngombwa ko umutoza Roberto Oliveira Gonçalves do Carmo akora impinduka mu busatirizi ngo arebe ko hari icyo zamufasha, yinjiza mu kibuga rutahizamu Nova Bayama na Nyandwi Saddam gusa ntibagira icyo bafasha Rayon Sports mu minota 90 y’umukino.
Gutsinda uyu mukino byafashije Mukura Victory Sports kuzuza amanota 6 mu mikino 2 ya shampiyona, amanota inganya na APR FC iyoboye iyi shampiyona. Mukura Victory Sports kandi yakuyeho agahigo kabi k’imyaka 6 yari imaze idatsinda Rayon Sports muri shampiyona.
Iyi kipe y’i Huye yaherukaga gutsinda Rayon Sports muri shampiyona, mu mukino wari wabaye ku wa 24 Ukwakira 2012.
