Mukura VS ibura abakinnyi batatu igenderaho irasura Bugesera FC
Kuri uyu wa gatanu ku kibuga cy’i Nyamata mu Bugesera, ikipe ya Mukura VS irahahurira na Bugesera FC bakina umukino w’umunsi wa 18 wa shampiyona y’ikiciro cya mbere.
Ni nyuma y’umukino ubanza amakipe yombi yari yahuriyemo i Huye ukarangira Mukura VS itsinze Bugesera ibitego 2-1.
Kuri iyi ncuro, ikipe ya Mukura VS ikomeje gucunganira hafi na Rayon Sports iramanuka mu kibuga ibura abakinnyi batatu isanzwe igenderaho.
Nk’uko amakuru aturuka muri iyi kipe y’i Huye abivuga, Myugariro Nshimirimana David ntagaragara muri uyu mukino kubera ibibazo bye bwite afite, cyo kimwe na Kapiteni wa Mukura Ciza Mugabo Hussein ufite ikibazo cy’imvune.
Undi utagaragara muri uyu mukino ni rutahizamu Twizerimana Onesme ufite amakarita atatu y’umuhondo atamwemerera gukina umunsi wa 18 wa shampiyona y’u Rwanda.
Mukura VS igiye gukina na Bugesera iheruka kwitwara nabi mu mukino w’umunsi wa 17 wa shampiyona. Uyu mukino yakiniye kuri Stade yayo warangiye itsinzwe na Rayon Sports ibitego 3-0, ihita inayambura umwanya wa kabiri ku rutonde rwa shampiyona. Amakipe yombi anganya amanita 37, gusa Rayon Sports izigamye umubare munini w’ibitego.
Iyi Rayon Sports nay o ifite urugamba rutoroshye ku gicamunsi cy’uyu wa gatanu, dore ko iza gucakirana na Sunrise mu mukino w’umunsi wa 18 wa shampiyona. Ni umukino uza kubera kuri Stade ya Kigali i Nyamirambo.
