Mu Rwanda habonetse ubwoko butazwi bwa COVID-19
Kuri iki Cyumweru tariki 25 Nyakanga 2021, ubwo yasobanuraga ibyagendeweho mu kongera iminsi itanu ku gihe abo mu Mujyi wa Kigali n’utundi turere umunani bagombaga kumara muri gahunda ya Guma mu rugo , Minisiteri y’Ubuzima yatangaje ko hari amako menshi ya virus ya Corona yamaze kugera mu Rwanda.
Iyi Minisiteri y’Ubuzima yagaragaje ko mu Rwanda hamaze kugera ubwoko butandatu bwa virusi itera Covid-19, burimo iyihinduranya izwi nka ‘Delta’ ndetse n’indi kugeza ubu hataramenyekana izina ryayo.
Minisitiri Dr Ngamije ntiyatangaje byinshi kuri iyo virusi itazwi, gusa yavuze ko nk’uko bimeze mu bihugu bitandukanye, ubwiganze bw’abarwaye Covid-19, ni abafite Delta.
Yavuze ko mu minsi icumi yari igiye gushira hashyizweho Guma mu rugo, hafashwe ibipimo mu byiciro bitandukanye, byagaragaje ko mu baturage by’umwihariko abo mu Mujyi wa Kigali harimo umubare uri hejuru w’abandura n’abahitanwa na Covid-19.
Yakomeje avuga ko ibipimo byafashwe mu tugari 161 two mu Mujyi wa Kigali ku matariki ya 17, 18 na 23 Nyakanga 2021, byagaragaje ko abantu 3965 banduye Covid-19.
Minisitiri Dr Ngamije yavuze ko muri abo bantu, uwo bamaraga gufata ibipimo, abashinzwe ubuzima bongeraga bagafata ibipimo byihariye bigamije kureba ubwoko bwa virusi uwapimwe afite.
Mu bipimo byafashwe, abagera kuri 56.6%, basanganywe Delta [yagaragaye bwa mbere mu Buhinde], abandi bangana na 20.2% basanganywe iyitwa SARS-CoV-2 ari nayo yakomotse mu Mujyi wa Wuhan, itagaragaza ukwihinduranya, ibyiswe ‘Wild Type’.
Ibindi bipimo bingana na 1.6%, ni ibya virusi yihinduranya ya Beta, iyi yabonetse bwa mbere muri Afurika y’Epfo, ndetse n’ibipimo bingana na 0.4% bya virusi ya B.1.526, izwi ku izina rya ‘Eta’ yabonetse bwa mbere mu Bwongereza.
Hari kandi ibindi bipimo 15.7% by’abasanganywe iyitwa Epsilon yagaragaye bwa mbere muri Leta Zunze Ubumwe za Amerika mu Mujyi wa California. Hari kandi n’ibindi bipimo 5.4% bya virusi ‘itazwi’.
Kuva mu mpera za 2019 ubwo Coronavirus yagaragaraga bwa mbere i Wuhan mu Bushinwa, hamaze kuboneka ubwoko bwayo bwihinduranya bugera ku icyenda.
Hari bune bufatwa nk’ubuhangayikishije (Variants of Concern ,VOCs) ari bwo Alpha yabonetse bwa mbere mu Bwongereza, Beta yaturutse muri Afurika y’Epfo, Gamma yagaragaye bwa mbere muri Brésil ndetse na Delta yavumbuwe mu Buhinde.
Butanu bufatwa nk’ubudateye impungenge, ni Eta yagiye iboneka mu bihugu byinshi, Epsilon na Lota zagaragaye bwa mbere muri Leta Zunze Ubumwe za Amerika, Kappa yabonetse mu Buhinde ndetse na Lambda yahereye muri Peru.
Kugeza ubu imibare ya Minisiteri y’Ubuzima yerekana ko kuva icyorezo cya COVID-19 kigaragaye mu Rwanda muri Werurwe 2020, kimaze guhitana abarwayi 727.
Umuyobozi mukuru w’Ikigo cy’igihugu cyita ku buzima (RBC), Dr. Sabin Nsanzimana, atangaza ko kuba umubare w’abahitanwa na Covid-19 ku munsi ushobora kugabanuka, utabishingiraho ngo uvuge ko icyorezo cyamanutse kuko haba hari impamvu nyinshi zitandukanye zidafite aho zihuriye no kugabanuka kw’icyorezo.
Avuga ko biba bisaba ko bikurikiranwa iminsi runaka kugira ngo habone kwemezwa koko niba icyorezo cyagabanutse, hagendewe ku bushakashatsi bundi butandukanye bukorwa burimo no gufata ibipimo ku mubare w’abantu benshi, nk’uko Dr Nsanzimana yabitangaje.
Kuri iki Cyumweru taliki ya 25 Nyakanga 2021, Minisiteri y’Ubuzima yatangaje abantu bashya 616 banduye icyorezo cya COVID-19, bangana na 5.4% by’ibipimo 11,339 byafashwe mu masaha 24 ashize. Ni mu gihe mu bipimo 132,319 byafashwe mu minsi 7 habonetsemo abarwayi bashya 7,905 bangana na 5.9%.
Uyu munsi kandi hatangajwe abantu bashya 15 bishwe na COVID-19 barimo abagore 8 b’imyaka 89 (Nyagatare), 77 (Gatsibo), 74 (Burera), 64 (Rusizi), 64 (Muhanga), 50 (Musanze) & 36, 24 (Kigali) n’abagabo 7 b’imyaka 78, 74, 57, 41, 38 (Kigali), 59 (Nyagatare) & 37 (Karongi).
Uyu munsi abantu basezerewe mu bitaro bakize icyo cyorezo ni 14 mu gihe abashya bahawe ibitaro ari 10. Mu minsi irindwi na bwo hasezerewe abarwayi 113 mu gihe abashya binjiye mu bitaro ari 229, ubu abarembye barimo bakaba ari 66.
Yanditswe na Vainqueur Mahoro
