Mu Rwanda bwa mbere abarenga 60 barembejwe na COVID-19

Minisiteri y’Ubuzima mu Rwanda yatangaje ko ku Cyumweru tariki 4 Nyakanga 2021, mu Rwanda abantu 889 babasanzemo Covid-19, muri bo 309 bakaba babonetse i Kigali.

Kuri uyu munsi kandi nkuko n’imibare ibigaragaza ntawakize, abantu batanu bitabye Imana, naho abarembye ni 61 ukaba ari wo mubare uri hejuru w’abarembye utangajwe.

Abitabye Imana ni abagore babiri b’imyaka 67 na 36 n’abagabo batatu b’imyaka 63, 58 na 32 bose bari i Kigali, bakaba bahise buzuza umubare w’abantu 470 bamaze kwicwa n’iki cyorezo mu Rwanda.

Mu Rwanda abari kuvurwa bose hamwe ni 14,509.

Bivugwa ko ababarirwa hejuru ya 90% barwaye bafite ibimenyetso byoroheje cyangwa nta n’ikimenyetso na kimwe bagaragaza.

Ibipimo bimaze gufatwa kuva umurwayi wa mbere yatahurwa mu Rwanda ni 1,66572,746 birimo 6,889 byafashwe mu masaha 24 ashize.

Uyu munsi, abantu 66 bahawe doze ya mbere y’urukingo rwa COVID-19, bityo abamaze gukingirwa muri rusange bagera ku 391,954.

Kugeza ubu kandi abantu 251,475 bamaze guhabwa doze ya kabiri y’urukingo rwa COVID-19 (AstraZeneca) barimo 12 bayihawe kuri iki cyumweru.

Kuri ubu, abenshi mu barimo guhabwa doze ya kabiri biganjemo abahawe doze ya mbere y’urukingo rwo mu bwoko bw’Astra Zeneca

Inzego zishinzwe ubuzima zisaba Abaturarwanda baba abakingiwe n’abatarakingirwa gukomeza kwitwararika birinda kwandura cyangwa kwanduza abandi icyorezo cya COVID-19 gikomeje kugaragaza ubukana mu Rwanda n’ahandi ku isi.

By: Vainqueur Mahoro