01/12/2021 Vainqueur Mahoro

Mu mafoto irebere uko Inkura zavanywe muri Afurika y’Epfo zikagera mu Rwanda

Ku wa Mbere tariki 29, Ugushyingo, 2021 ubuyobozi bwa RDB n’ubwo Pariki y’Akagera byeretse abanyamakuru inkura 30 ziswe ko zera (whites rhinos) ziherutse gukurwa muri Afurika y’Epfo zikaza gutuzwa mu Rwanda.

Ibi byakozwe binyuze mu bufatanye bw’Urwego rw’Igihugu rw’Iterambere (RDB), Howard G Buffet n’Ikigo African Parks, Ni impano yatanzwe n’Ikigo Beyond Phinda Private Game Reserve cyo muri Afurika y’Epfo mu gihe kugira ngo zigere mu Rwanda byatwaye ibihumbi 320$.

Izi nkura zagejejwe mu Rwanda zirimo 19 z’ingore na 11 z’ingabo, zikaba zarageze i Kigali nyuma yo gukora urugendo rw’amasaha 40.

Ni ubwa mbere mu Rwanda hagiye kuba inkura zera (whites rhinos) kuko ubusanzwe ziba muri Kenya, Uganda na Zambia.

Nyuma y’umunsi umwe zigeze mu Rwanda, itsinda ry’abanyamakuru barenga 15 beretswe izo nyamaswa zibarirwa mu nyamaswa eshanu zitagomba kubura muri Pariki ziba mu bisiza.

Umuyobozi mukuru w’agateganyo ushinzwe ubukerarugendo no kubungabunga ibidukikije mu Kigo cy’igihugu gishinzwe iterambere, Ariella Kageruka yabwiye abanyamakuru ko ziriya nkura zizafasha mu kuzamura ingano y’amadovize u Rwanda rukura mu bukerarugendo.

Ubwo inkura zabaga mu Rwanda zose zari zishize mu 2007 ubwo hapfaga iya nyuma, nyuma y’imyaka 10, mu 2017, ni bwo u Rwanda rwagaruye inkura zirabura muri Pariki y’Igihugu y’Akagera, haza 18 (ingabo umunani n’ingore 10) ziturutse muri Afurika y’Epfo ku bufatanye bwa RDB ndetse n’ umuryango wa Howard G Buffett.

Ubukerarugendo bugira uruhare runini mu guteza imbere abaturage binyuze mu mishinga inyuranye harimo nka gahunda yo gusangiza abaturiye za pariki ibyavuyemo, byatangiye mu 2005.

Inkura 30 zigeze mu Rwanda zururukijwe indege bazishyira mu makamyo manini bazishakira Polisi iraziherekeza kugera muri Pariki y’Akagera.

Mu nzira hari hateguwe abantu bakenyeye baritera kugira ngo bazakire kandi bashimire n’abagire uruhare mu kuba zarazanywe mu Rwanda.

Zaje zisanga izindi nkura zirabura zazanywe mu Rwanda mu mwaka wa 2017.

Mu mwaka wa 2019 hari izindi nkura eshanu zazanywe muri Pariki y’Akagera zivanywe muri Repubulika ya Tchèque.

Inkura zera ni zo nkura nini mu bugari kurusha izindi aha bapimaga umubyimba n’uburebure

Izi nkura zageze mu Rwanda nyuma yo gukora urugendo rw’amasaha 40

Inkura u Rwanda rwakiriye zirimo 19 z’ingore na 11 z’ingabo

Ni ubwa mbere mu Rwanda hagiye kuba inkura zera

Kuri ubu, muri Pariki y’Akagera hari inkura 56 nyuma yo kwakira 30 zageze mu Rwanda ku Cyumweru

Ifoto y’indege yerekana uko ziriya nkura zabanje kwitabwaho

Share on Facebook