Mu Bushinwa hafatwa nk’inkomoko ya Covid-19 hagaragaye ikindi cyorezo gihangayikishije kuyirushya

Mu gihugu cy’Ubushinwa hafatwa nk’inkomoko y’icyorezo cya Covid-19 ihangayikishije Isi cyane, haravugwa ko hagaragaye ikindi cyorezo gihangayikishije kuyirusha nk’uko byatangajwe n’igitangazamakuru cya Leta.

Icyorezo cya Covid-19 cyabonetse bwa mbere mu mujyi wa Nanjing mu Bushinwa ubu cyageze mu ntara eshanu no mu murwa mukuru Beijing, igitangazamakuru cya leta kikavuga ko ubu ari bwo bwandu bwa mbere bukaze bw’iyi virusi nyuma y’ubw’i Wuhan.

Abantu hafi 200 bamaze kwandura nyuma yuko iyo virusi ibonetse bwa mbere ku kibuga cy’indege gikoreshwa cyane cyo muri uwo mujyi ku itariki ya 20 y’ukwezi kwa karindwi.

Ingendo zose z’indege ziva ku kibuga cya Nanjing zigiye guhagarikwa kugeza ku itariki ya 11 y’ukwezi kwa munani, nkuko ibitangazamakuru byaho bibivuga.

Kumenyesha

Uramutse ukeneye kumenyekanisha ibikorwa byawe (kwamamaza) cyangwa gutanga itangazo runaka uhawe ikaze kuri Teradignews.rw.
Huhamagara 0780341462 / 0784581663 // Whatsapp 0784581663 / 0789 564 452.

Abategetsi na bo batangije gahunda yo gupima Covid-19 muri uwo mujyi, mu gihe barimo kunengwa “kunanirwa” guhangana n’ubwo bwandu.

Abaturage b’uwo mujyi bose uko ari miliyoni 9.3 – harimo n’abashyitsi bawusuye – bagiye gupimwa, nkuko bitangazwa n’ibiro ntaramakuru Xinhua News bigenzurwa na leta.

Ibyatangajwe ku mbuga nkoranyambaga bigaragaza imirongo miremire y’abantu, ndetse amakuru avuga ko abategetsi bashishikarije abaturage kwambara udupfukamunwa, guhana intera ya metero imwe no kwirinda kuvugana mu gihe bategereje gupimwa.

Abategetsi bavuze ko ubwoko bwa Delta bwa Covid-19 bwandura byihuse cyane ari bwo nyirabayazana y’ubwo bwandu bushya, bongeraho ko ubwandu bwakwirakwiriye ahandi hantu kubera ukuntu icyo kibuga cy’indege gikoreshwa cyane.

Ding Jie, umutegetsi mu rwego rw’ubuvuzi i Nanjing, yabwiye abanyamakuru ko ubwo bwandu bufitanye isano n’abakora isuku bakoze ku ndege ivuye mu Burusiya yageze muri uwo mujyi ku itariki ya 10 y’ukwezi kwa karindwi.

Abo bakora isuku ntabwo bakurikije ingamba zikaze z’isuku, nkuko bitangazwa na Xinhua News.

Ubuyobozi bw’icyo kibuga cy’indege bwanenzwe bikomeye, urwego rwo hejuru rw’imyitwarire myiza rwo mu ishyaka rya gikomunisti riri ku butegetsi ruvuga ko bufite “ibibazo birimo nko kubura ubugenzuzi ndetse n’ubuyobozi budakora kinyamwuga”.

Ibipimo byafashwe byagaragaje ko ubu iyi virusi imaze gukwirakwira mu mijyi itari munsi ya 13 irimo na Chengdu n’umurwa mukuru Beijing.

Ariko inzobere zasubiwemo n’igitangazamakuru Global Times kibogamiye kuri leta, zavuze ko zemera ko iki kiza kikiri mu cyiciro cyo mu ntangiriro kandi ko gishobora guhagarikwa.

Abategetsi bo mu mujyi wa Nanjing bavuze ko barindwi muri abo banduye ubu barembye.

Uku kwiyongera kw’ubwandu kwatumye bamwe mu bakoresha imbuga nkoranyambaga bo mu Bushinwa bahwihwisa niba inkingo z’Ubushinwa hari icyo zimara ku bwoko bwa Delta.

Ntibizwi niba abo banduye bari barakingiwe.

Ibihugu bimwe byo muri Aziya y’amajyepfo ashyira uburasirazuba bicungira ku nkingo z’Ubushinwa, biherutse kuvuga ko bizakoresha inkingo za Covid-19 z’ibindi bihugu.

Kugeza ubu, Ubushinwa ahanini bwashoboye guhagarika Covid-19 mu gihugu bufunga imipaka ndetse bunihutira kuburizamo ibiza byayo mu duce byagiye byadukamo.