Mu birori byitabiriwe n’abafana ba Rayon Sports, Intare za APR FC zijihije imyaka itatu zimaze zibayeho
Ku mugoroba w’ejo ku wa gatandatu, abafana ba APR FC bibumbiye muri Fan Club izwi nk”Intare za APR FC” bizihije isabukuru y’imyaka itatu fan club yabo imaze ibayeho, mu birori by’akataraboneka byanitabiriwe na bamwe mu bafana ba Rayon Sports.
Ni ibirori byabereye muri Nobleza Hotel iherereye mu karere ka Kicukiro.
Ibi birori byitabiriwe na Gen. Mubarak Muganga, Umuyobozi w’Ingabo mu Mujyi wa Kigali no mu Ntara y’Iburasirazuba, akaba n’umuyobozi wungirije mu ikipe ya APR FC ari na we wari umushyitsi mukuru muri uyu muhango.
Harimo kandi Col. Kabagambe ukuriye abafana, Kazungu Edmond ukuriye abafana ba APR FC mu Mujyi wa Kigali, abakinnyi ba APR FC bose ndetse Staff ya APR FC yose.
Uretse abasanzwe bari muri APR FC ndetse n’abandi bafana na APR FC, ibi birori kandi byitabiriwe n’bafana ba Rayon Sports bo muri Fan Club ya Gikundiro Forever ndetse na Mike Runigababisha ukuriye Fan Base ya Rayon Sports akaba n’umuyobozi ya March Generation Fan Club.
Muri ibi birori hatangiwemo ibihembo binyuranye, aho buri mukinnyi ndetse na Staff bambitswe imidari y’ishimwe.
Hakizimana Muhadjir yahembwe nk’umukinnyi watsinze igitego cyiza (igitego yatsinze Etincelles muri shampiyona) ndetse anahembwa nk’umukinnyi watsinze ibitego byinshi muri APR FC muri Shampiyona y’uyu mwaka aho yatsinze 13.
Mwishywa we Djihad Bizimana wamaze kwerekeza i Burayi we yahembwe nk’umukinnyi witwaye neza muri APR FC muri uyu mwaka.
Afande Muganga Mubarak wari umushyitsi mukuru muri uyu muhango yashimiye intare za APR FC ndetse n’abandi bafana ba APR ku kuba barashyigikiye ikipe igatwara igikombe cya shampiyona.
Uyu muyobozi kandi yanagarutse kuri Rayon Sports, avuga ko n’ubwo ari ikipe ihangana na APR FC isanzwe ari n’ikipe bakunda.
Ati” Rayon Sports ni ikipe dukunda, ngira ngo igiye no gusenyuka turi aba mbere barwana mu buryo bwose bushoboka kugira ngo igumeho kuko iduha kwipima kandi tukipima neza.”
Maitre Cyubahiro Didier wavuze mu izina ry’abagize Gikundiro Forever yashimiye abagize Intare za APR FC kuba baratekereje kubatumira, ababwira ko nabo baramutse bagize ibirori nk’ibyabo, nabo babatumira, bagakomeza gufatanya guteza imbere umuco na Siporo.
Ati” Twishimiye kubana namwe muri ibi birori nubwo turi abo mu ikipe mukeba. Ubundi guhangana biba bikwiriye kurangirira muri Stade. Hanze y’ikibuga, dufatanyije kubaka no guteza imbere umuco wa Siporo mu banyarwanda bose. Iki ni igikorwa cyiza mwakoze, namwe muhawe ikaze mu bikorwa byacu twategura. Twishimiye ko hari barumuna bacu bateye ikirenge mu cyacu kuko twe nka Gikundiro Forever twavutse muri 2013.”
