Mozambique:Umukuru w’ibyihebe yiciwe i Cabo Delgado
Raporo yaturutse muri Mozambike ku wa gatanu, tariki ya 25 Kanama, yerekana ko umuyobozi mukuru w’inyeshyamba zishamikiye ku idini ya Isilamu yiciwe mu ntara yo mu majyaruguru ya Mozambike, Cabo Delgado.
Nk’uko ibitangazamakuru byo muri iki gihugu cy’amajyepfo ya Afurika bibitangaza, Bonomade Machude Omar uzwi kandi ku izina rya Ibin Omar cyangwa Abu Suraka, wari umuhuzabikorwa mukuru w’ibitero by’iterabwoba muri Cabo Delgado, yishwe ku wa kabiri, tariki ya 22 Kanama, ubwo yari mu mirwano i Quiterajo, mu karere ka Macomia.
Omar yari ayoboye itsinda rishamikiye kuri ISIS, Ahlu-Sunnah wal Jama’a (ASWJ).
Yiciwe mu bikorwa byakozwe n’ingabo z’igihugu cya Mozambike (FADM), ingabo z’u Rwanda (RDF), na SAMIM [Ingabo zoherejwe na SADC].
Nk’uko ibitangazamakuru byaho bibitangaza ngo kwemeza urupfu rwa Omar bikurikiye urupfu rw’abandi bayobozi babiri b’iterabwoba – Abu Kital na Ali Mahando – na bo bagize imyanya ikomeye muri uyu mutwe wa kisilamu.
Ingabo za Mozambike zavuze ko Omar yari umuyobozi mukuru w’ibitero by’iterabwoba byibasiye Cabo Delgado kuva mu 2017, bihitana byibuze abasivili 4000.
Ibikorwa bya gisirikare bihuriweho n’ingabo za Mozambike, u Rwanda, na SADC muri Cabo Delgado byatangiye muri Nyakanga 2021.
