Mozambique: Inzego z’umutekano z’u Rwanda zivuganye izindi nyeshyamba (Amafoto)
Kuwa Gatandatu tariki ya 7 Kanama 2021, Inzego z’umutekano z’u Rwanda (Rwanda security forces) muri Mozambique zishye izindi nyeshyamba enye mu mirwano yashyamiranyije impande zombi.
Imirwano ikomeye yabereye mu gace kitwa 1st May mu bilometero 12 ugana ku cyicaro gikuru cy’Akarere ka Mocimboa da Praia, mu Ntara ya Cabo Delgado.
Uretse abapfuye, inzego z’umutekano z’u Rwanda zafashe imbunda 3 za SMG (Small Mahine Guns) n’imbunda 2 za RPG ( rocket-propelled grenade), grenade 6 n’igikapu kirimo imyirondoro y’abarwanyi bishwe.
Akarere ka Mocimboa da Praia ni ko karimo ibirindiro bikuru ry’ibyihebe. Inzego z’umutekano z’u Rwanda na Mozambique zikomeje gusatira ibirindiro bikuru by’umutwe w’iterabwoba umaze imyaka 4 muri aka gace.
Gufata ibirindiro by’uyu mutwe w’iterabwoba no guhagarika urujya n’uruza rw’ubutabazi n’ibiribwa wabonaga, biri mu bizatuma inyeshyamba zihungira mu mashyamba aho ubuzima bw’izizaba zisigaye buzaba bugoye.
Abaturage bakuwe mu byabo n’inyeshyamba barashimira inzego z’umutekano z’u Rwanda ku butabazi n’ubufatanye na Leta ya Mozambique bukomeje gutanga umusaruro ufatika, bakaba bafite icyizere ko imitwe y’iterabwoba igiye guhashywa bagasubira mu byabo no mu buzima busanzwe.
Umwe mu baturage wavuganye n’abanyamakuru yagize ati: “Twavuye mu byacu, abana bacu bamaze igihe bararetse ishuri. Ubu icyo dutegereje ni uko ingabo z’u Rwanda n’iza Mozambique zitubwira ngo dusubire mu byacu. Turashima Leta y’u Rwanda yaduhaye ubufasha bw’agaciro gakomeye.”
Hagati aho kandi RBA yiboneye inzego z’umutekano z’u Rwanda zigenzura umutekano ku cyambu cya Afungi hamwe no ku ruganda rwa Gas Natural LNG (Liquefied Natural Gas), uruganda rufite ishoramari rya miliyari 20 z’amadolari y’Amerika. Ibi bikorwa byose inzego z’umutekano z’u Rwanda zirabikora zifatanyije n’iza Mozambique.
Kumenyesha
Uramutse ukeneye kumenyekanisha ibikorwa byawe (kwamamaza) cyangwa gutanga itangazo runaka uhawe ikaze kuri Teradignews.rw.
Hamagara 0780341462 / 0784581663 // Whatsapp 0784581663 / 0789 564 452
