MONUSCO iravugwaho uruhare mu mugambi wo gukura AFC/M23 i Goma

Ingabo z’Umuryango w’Abibumbye ziri mu butumwa bw’amahoro muri Repubulika Iharanira Demokarasi ya Congo (MONUSCO), biravugwa ko zishobora kuba ziri gufatanya mu gikorwa cyo kwambura Umujyi wa Goma umutwe wa AFC/M23.

Uyu mutwe wafashe Goma ku wa 27 Mutarama 2025. Mbere y’uko iyi nyeshyamba ifata umujyi, MONUSCO yari isanzwe ifatanya n’ingabo za Leta kurinda uwo mujyi ndetse na Sake binyuze mu gikorwa bise ‘Opération Springbok’.

Ingabo za FIB (Force Intervention Brigade), igice cyihariye cya MONUSCO kigizwe n’abasirikare bo muri Afurika y’Epfo, Tanzania na Malawi, ni zo zari zarashoboye gutsimbura M23 mu 2013.

Mu kwezi kwa Werurwe 2025, Umuyobozi wa MONUSCO, Bintou Keita, yabwiye Akanama ka Loni gashinzwe umutekano ko ibikorwa byo kurwanya AFC/M23 byahagaritswe nyuma y’aho Ikibuga cy’Indege cya Goma gifunzwe.

Kugeza ubu, MONUSCO icumbikiye abasirikare ba Repubulika Iharanira Demokarasi ya Congo (FARDC), abarwanyi ba Wazalendo ndetse n’abandi.
Muri icyo gihe, ingabo za SAMIDRC, zituruka mu Muryango wa Afurika y’Amajyepfo, nazo ziri hafi y’Umujyi wa Goma.

Nyuma y’igeragezwa ry’igitero cyakorewe AFC/M23 ku wa 11 rishyira uwa 12 Mata, cyari cyakozwe n’ingabo za RDC, iza SAMIDRC, Wazalendo na FDLR, hari amakuru yatangiye kuvuga ko n’ingabo za MONUSCO zaba ziri mu gikorwa cyateguwe mu ibanga kigamije gukura AFC/M23 i Goma.

Ayo makuru avuga ko mu bigo bya MONUSCO cyane cyane kiri hafi y’ikibuga cy’indege, harimo gutegurwa igitero kizakorwa mu minsi ya vuba.

Ariko kuri tariki 13 Mata, MONUSCO yamaganye ibi bivugwa, ivuga ko nta gitero na kimwe kiri gutegurirwa mu bigo byayo, ndetse ko itakwemera ko ibikorwa nk’ibi bihakorerwa.

Yagize iti: “Inshingano zacu ziracyari ugukingira abasivili, gushyigikira amahoro no gutanga ubufasha ku ngabo za Leta mu bijyanye n’umutekano, nk’uko tubisabwa n’akanama ka Loni gashinzwe umutekano.”