Mohammed Salah yegukanye igihembo cy’umukinnyi w’umwaka muri Premier League
Mohammed Salah, umunya Misiri ukinira ikipe ya Liverpool mu gihugu cy’ubwongereza, yaraye yegukanye igihembo cy’umukinnyi mwiza waranze umwaka w’imikino wa 2017/18 muri shampiyona y’Abomgereza, English Premier League.
Mo Salah w’imyaka 25 y’amavuko yatwaye iki gihembo ahigitse umubiligi Kevin De Bruyne usanzwe ukinira Manchester City, ndetse na Harry Eduard Kane wa Tottenham Hotspurs bari bahanganye.
Salah wageze muri Liverpool mu mwaka ushize akubutse muri AS Roma ni umwe mu bafashije cyane ikipe ya Liverpool kuba iri ku mwanya wa gatatu ku rutonde rwa shampiyona, akaba kandi yaramaze kuyitsindira ibitego 31 muri shampiyona binatumama ari na we uyoboye abamaze gutsinda ibitego byinshi muri iyi shampiyona.
Mohammed Salah acyegukana iki gikombe, yabaye umukinnyi wa kabiri ukomoka ku mugabane wa Afurika wegukanye iki gihembo nyuma ya Ryad Mahrez, wagihawe muri 2016 ubwo yafashaga Leicester City kwegukana igikombe cya shampiyona.
Yananditse kandi amateka yo kuba umukinnyi wa mbere ukomoka mu Misiri ubashije kwegukana iki gihembo.
Mu bandi bakinnyi bahembwe harimo Umudage Leroy Sane ukinira Manchester City watowe nk’umukinnyi mwiza ukiri muto, mu gihe Fran Kirby ukinira Chelsea y’abagore yatowe nk’umukinnyi mwiza wahize abandi muri icyo cyiciro.
Ku rundi ruhande Lauren Hemp wa Manchester City y’abagore we yabaye umukinnyi mwiza ukiri muto.
