Miss Rwanda 2020 iratangira kuri uyu wa Gatandatu, ibyaranze aharatangirizwa iri rushanwa

Guhera kuri uyu wa 21 Ukuboza 2020 haratangira irushanwa ryo gushaka umukobwa uzasimbura Miss Rwanda 2019 akaba Miss Rwanda 2020, iri rushanwa riratangirira mu ntara y’Uburengerazuba mu karere ka Rubavu hakorwa ijonjora ry’ibanze.

Iri jonjora ry’ibanze rirahera i Rubavu kuri Western Mountain Hotel guhera saa saba z’amanywa.

Bimwe mu byakunze kuranga aka gace karatangiriramo irushanwa rya Miss Rwanda ni udushya twa hato na hato twagiye tuvugisha abantu benshi ku bijyanye n’iri rushanwa, ari ko kandi abakobwa biyamamariza mu Burengerazuba bakunze guhatana bakegukana ikamba rya Miss Rwanda, ubanza ari ukubitondera no kuri iyi nshuro.

Mu 2016 Mutesi Jolly  yatwaye ikamba, mu 2017 Iradukunda Elsa araryegukana, mu gihe  Iradukunda Liliane yaryegukanye mu 2018 kandi aba bose bari biyamamarije mu Ntara y’Uburengerazuba,. Ikamba ryavuyeyo muri uyu mwaka wa 2019 ubwo ryambikwaga Nimwiza Meghan wari uhagarariye umujyi wa Kigali.

Ikindi cyaranze aka gace mu marushanwa ya Miss Rwanda ategurwa na Rwanda Inspiration Backup ni umukobwa witwa Mwiseneza Josianne, uyu we yabaye ikimenyabose mu Rwanda n’imahanga ndetse yanegukanye ikamba rya Miss Popularity mu 2019, uyu mukobwa yakoze agashya ajya mu majonjora y’ibanze yabereye i Rubavu agenda n’amaguru akoze urugendo rw’ibirometero birenga 14.

Uretse ibi kandi yahageze yanasitaye benshi bamujya inyuma bavuga ko yitinyutse akajya mu irushanwa rya Miss Rwanda kandi rivugwaho kuba ari iry’abana babakire, bakuze neza, bafite igihagararo cyiza n’ibindi, ariko Josianne akarijyamo mu bushobozi yari afite, uyu mukobwa yabonye abafana badasanzwe ndetse anagenerwa inkunga n’abari imbere mu gihugu ndetse no hanze, yewe na magingo aya aracyavugwa ntazava mu mitwe ya benshi.

Aha i Rubavu kandi ni ho havuye umukobwa wavuze ko ateye nk’igisabo ndetse bikanatuma aba Miss Popularity, uyu nta wundi ni Uwase Hirwa Honorine, akibivuga yahise ashyushya irushanwa rikiri ribisi.

Hari mu 2017, umukemurampaka Mike Karangwa yamusabye kuvuga uburyo imyambarire ye yagaragazaga ishusho y’umunyarwandakazi maze ahita avuga ngo “umunyarwandakazi mwiza ni uteye nk’igisabo namwe murabibona.”

Kuva ubwo uyu mukobwa yahise aba icyamamare ahita yitwa ‘Igisabo’ kuva ku munsi wa mbere w’irushanwa kugeza rirangiye ndetse bihemuhesha gutorwa nka Miss Popularity 2017.

Hahise hanaduka imvugo  “Igisabo” ikoreshwa mu gihe umuntu ashaka kuvuga umukobwa ufite amabuno manini no mu nda hato.

Impinduka zizagaragara muri Miss Rwanda zatangajwe mu kiganiro n’itangazamakuru cyabereye kuri KCC kuri uyu wa 18 Ukuboza 2019 ni uko MTN Rwanda yakiriwe nk’umuterankunga mushya w’irushanwa hanakirwa abandi bafatanyabikorwa b’imena barimo Ecobank mu gihe Cogebank yo itakiri umuterankunga muri Miss Rwanda.

Umuyobozi wa Rwanda Inspiration Back Up itegura iri rushanwa, Ishimwe Dieudonne, yavuze ko usibye impinduka zagaragaye mu bafatanyabikorwa n’irushanwa ubwaryo rizabonekamo izindi nk’aho ubu Miss Rwanda azaba Brand Ambassador wa African Improved Food naho Miss Popularity akajya agirana imikoranire mishya na MTN Rwanda.

Umukobwa uzegukana ikamba rya Miss Rwanda 2020 azajya ahembwa umushahara wo ku kwezi ungana n’ibihumbi magana inani y’u Rwanda (800,000 Frw) ndetse azahabwa imodoka ya Suzuki Swift na Rwandamotor na yo yiyongereye mu bafatanyabikorwa. Uyu mwari azajya ahabwa n’ibindi bihembo bitandukanye.

MTN Rwanda uyu mwaka niyo izahemba Miss Popularity uzahabwa miliyoni imwe n’igice y’amafaranga y’u Rwanda (1,500,000 Frw) ndetse agahabwa amasezerano yo gukorana n’iki kigo mu kwamamaza gahunda ya Yolo igenewe urubyiruko.

Ikindi cyahindutse ni uko nta mukobwa wemerewe gutsindirwa mu ntara imwe ngo ajye guhatanira mu yindi nkuko byari bisanzwe bigenda.

Multi Design Group izahemba Igisonga cya Mbere cya Miss Rwanda 1 200 000 Frw, inahe Miss Rwanda itike y’indege izamujyana Dubai mu biruhuko.

Miss Rwanda amajonjora yo muri buri ntara aratangira ku wa Gatandatu tariki 21 Ukuboza 2019 bahereye i Rubavu, bazakomereza i Musanze tariki 28 Ukuboza 2019 mu gihe tariki 4 Mutarama 2020 bazerekeza I Huye mu ntara y’Amajyepfo nyuma berekeza i Burasirazuba mu karere ka Kayonza tariki 11 Mutarama 2020 amajonjora asorezwe i Kigali tariki 18 Mutarama 2020.

Igikorwa cya Miss Rwanda kizasozwa tariki 22 Gashyantare 2020 aribwo hazamenyekana uwegukanye ikamba rya Nyampinga w’u Rwanda.