Miss Rwanda 2020: Amafoto y’abakobwa batsindiye guhagararira intara y’Uburasirazuba
Abakobwa 15 babonye itike ibemerera guhagararira Intara y’Uburasirazuba mu irushanwa rya Miss Rwanda 2020, ryabereye mu Karere ka Kayonza kuri uyu wa 11 Mutarama 2020.
Iyi ntara ni yo itanze abakobwa benshi kuva iri rushanwa ryo gushaka umukobwa uzaba Miss Rwanda 2020 ryatangira.
Urugendo rwo gushakisha umukobwa uzegukana ikamba rya Nyampinga w’u Rwanda 2020 rwatangiriye i Rubavu mu Burengerazuba bw’u Rwanda aho abakobwa batandukanye bahakomoka bari babukereye biteguye guhatana no kwerekana ko bafite ubwiza bufite intego.
Kayonza ni ahantu ha gatatu hatoranyirijwe abakobwa bazavamo uwambikwa ikamba rifitwe na Nimwiza Meghan wegukanye irya 2019.
Ku ikubitiro irushanwa ryatangiriye mu Karere ka Rubavu ku wa 21 Ukuboza 2019 ahavuye abakobwa batandatu; i Musanze ryahageze ku wa 28 Ukuboza 2019 hatoranywa batandatu mu gihe ijonjora riheruka ryabereye I Huye ku wa 4 Mutarama 2020, ryasize abakobwa barindwi aribo bemerewe gukomeza.
Intara y’Uburasirazuba ifite umwihariko muri Miss Rwanda kuko ni yo yatanze Nyampinga w’u Rwanda wa 2014, Akiwacu Colombe.
Abakobwa bashaka ikamba bageze aho irushanwa ribera hakiri kare, ku maso bariteguye kunyura imbere y’Akanama Nkemurampaka no gusobanura imishinga bafite yazabambutsa bakagera ku nzozi zabo zo kwambara ikamba.
Nyuma ya Kayonza, irushanwa rizakomereza mu Mujyi wa Kigali ari naho hazasorezwa ijonjora ry’ibanze ku wa 18 Mutarama 2020.
Abakobwa 90 ni bo biyandikishije ngo bahatanire guhagararira Intara y’Uburasirazuba muri Miss Rwanda 2020.
Muri bo 41 gusa ni bo bageze kuri Silent Hill Hotel ahabereye ijonjora ry’ibanze ariko 30 baba aribo bemererwa kunyura imbere y’Akanama Nkemurampaka.
Umukobwa uzegukana ikamba rya Miss Rwanda 2020 azajya ahembwa umushahara wo ku kwezi ungana n’ibihumbi magana inani y’u Rwanda (800,000 Frw) ndetse azahabwa imodoka ya Suzuki Swift na Rwandamotor na yo yiyongereye mu bafatanyabikorwa. Uyu mwari azajya ahabwa n’ibindi bihembo bitandukanye.
MTN Rwanda uyu mwaka niyo izahemba Miss Popularity uzahabwa miliyoni imwe n’igice y’amafaranga y’u Rwanda (1,500,000 Frw) ndetse agahabwa amasezerano yo gukorana n’iki kigo mu kwamamaza gahunda ya Yolo igenewe urubyiruko.
Ikindi cyahindutse ni uko nta mukobwa wemerewe gutsindirwa mu ntara imwe ngo ajye guhatanira mu yindi nkuko byari bisanzwe bigenda.
Multi Design Group izahemba Igisonga cya Mbere cya Miss Rwanda 1 200 000 Frw, inahe Miss Rwanda itike y’indege izamujyana Dubai mu biruhuko.
Kanda hano urebe uko aba bakobwa baciye imbere y’akanama nkemurampaka
Amazina na nimero by’abakobwa 15 bakomeje mu kindi cyiciro
1. Numukobwa Dalillah (No 26)
2. Niheza Deborah (No 3)
3. Umutesi Nadege (No 17)
4. Ineza Charlène (No 5)
5. Nikuze Icyeza Aline (No 15)
6. Umwiza Phiona (No 6)
7. Kansime Deborah (No 9)
8. Ingabire Rehema (No 7)
9. Wihogora Phionnah (No 4)
10. Kansime Deborah (8)
11. Ingabire Denyse (24)
12. Nyinawumuntu Rwiririza Delice (No 25)
13. Munezero Grace (21)
14. Teta Ndenga Nicole (No 30)
15. Ingabire Diane (28)
