Miss Iradukunda Elsa yateguye irushanwa ryo koga
Miss Rwanda 2017, Iradukunda Elsa, agiye gutangiza irushanwa ngarukamwaka ryo koga rizahuriza hamwe amatsinda atandukanye mu rwego rwo gushishikariza abana b’abakobwa gukunda imikino ngororamubiri.
Ni irushanwa rizaba kuwa 12 kanama 2017 ahitwa Cercle sportif de Kigali iherereye mu Rugunga mu mujyi wa Kigali, rizahuza abantu batandukanye bari hagati y’imyaka 8 na 25 hakazatangwa ibihembo bitandukanye gusa kubera ko akivugana n’abaterankunga akaba yirinze gutangaza amakuru ku kijyanye no guhemba.
Iri rushanwa rikaba rizahuriza hamwe amatsinda y’abakobwa n’abasore basanzwe bakora ibjyanye no koga mu buryo bw’umwuga, ndetse kuriyi nshuro abakora uyu mwuga ku giti cyabo bakaba batemerewe guhatana muriri rushanwa.
Amatsinda yatumiwe akaba ariyo azitabira kuriyi nshuro , kwinjira muriki gikorwa kubazashaka kuza kwihera ijisho bizaba ari amafaranga igihumbi. Iki gikorwa kizatangira mu masaha ya saa tatu za mu gitondo kugeza saa munani z’amanywa.
Kugeza ubu hazahatana amatsinda umunani ndetse buri tsinda rikazahatana n’ayandi bitewe n’imyaka abaririmo bafite mu buryo bwo guhuza abahatana bari mu kigero kimwe mu myaka, abazahatana bakazakoresha uburyo butandukanye bwo koga.
Iki gikorwa kizahuriza hamwe amatsinda azaturuka mu ntara zose z’u Rwanda ndetse n’abo mu mujyi wa Kigali, avuga ko kugeza ubu ibijyanye n’ibihembo batarabishyira ku murongo kuko bakivugana n’abaterankunga ndetse n’abandi bafatanya bikorwa.
Miss Elsa asanzwe akora siporo yo koga ndetse anatangaza ko yatangiye gukora iki gikorwa afite imyaka 9. Akaba abikunda kubera ko iyo umuntu ayikora aba agorora ingingo zose z’umubiri ndetse akaba yanibagirwa ibintu byose byari byamuteye umunaniro wo mu bwonko [stress].
Miss Elsa w’imyaka 19 avuka mu muryango w’abana umunani [abakobwa batandatu n’abahungu babiri] akaba ari uwa kane, yambitswe ikamba rya nyampinga w’u Rwanda kuwa 25 gashyantare 2017.
Akomeje gukora ibkorwa bitandukanye nka nyampinga w’u Rwanda yibanda cyane kubijyanye n’umushinga afite wo guteza imbere ibikorerwa mu Rwanda.
Miss Iradukunda Elsa azahagararira u Rwanda mu irushanwa rya Miss World 2017 rizabera mu gihugu cy’Ubushinwa mu mpera z’uyu mwaka ahitwa Shenzhen Dayun Arena stadium mu Mujyi wa Shenzhen.
Theogene Uwiduhaye/Teradignews
