Miss Colombe yashwishurije umusore wihaye kumuteretera ku mbuga nkoranyambaga
Miss Akiwacu Colombe usigaye yibera I Burayi mu gihugu cy’Ubufaransa yakurije inzira ku murima umusore wihaye kumusabira urukundo ku mbuga nkoranyambaga maze amubwira ko bitashoboka.
Uyu ni umukobwa wambitswe ikamba rya Nyampinga w’u Rwanda mu 2014, kuva yaba Nyampinga na nyuma y’aho ntabwo yigeze ajya mu rukundo ku buryo bweruye ngo abantu babe babimenya cyane ko mu myaka yashize byigeze guhwihwiswa ko akundana n’umuhanzi Christopher ariko aba bombi bahakana aya makuru .
Nta kabuza ariko kandi kuba ari umukobwa ufite uburanga , abasore bo ntibazuyaza mu gusaba urukundo ku mukobwa ujyanye n’amarangamutima yabo, kubera ko iterambere ryahinduye Isi umudugudu , biroroshye cyane kuvugana n’umuntu uri irwotamasimbi yewe mukanapanga gahunda zose mu kagera kuri gahunda ihamye.
Nkuko bigenda kuri Facebook n’izindi mbuga nkoranyambaga birashoboka ko wahasabira urukundo kandi inkumi ikakwemerera mukazabana akaramata, ibi niko byagenze kuri Miss Colombe ariko we akibona ubutumwa bumusaba urukundo ahita asubiza ko bidashoboka.
Byagenze bite? Umwe mu basore bamukurikira yamwandikiye ubutumwa amubwira ko yabonye ari umukobwa w’umutima ushobora kurwubaka rugakomera bityo ko yifuza ko yamubera umukunzi.
Yagize ati ”Komera, ndi umusore w’ingaragu kandi ndi gushakisha, ndakeka binyuze mu kuganira kuri uru rubuga twagenda twiyumvanamo kuko mfite gahunda kandi nshaka umukobwa w’umutima nkawe.”
Akiwacu yahise asubiza uyu musore ko adakeneye umukunzi azakura ku rubuga rwa Instagram, ati”Nshuti muryango w’abankurikira ku rubuga rwa Instagram ntabwo nshaka umukunzi, amahoro n’urukundo.”
Akiwacu Colombe yabaye Miss Rwanda ku Cyumweru tariki 23 Gashyantare 2014 aho yinjiye mu irushanwa rya Miss Rwanda ahagarariye intara y’Uburasirazuba, yahagarariye u Rwanda muri Miss Supranational 2016 ndetse mu 2017 yongera kugaragara mu birori by’imideli byo kumurika ibisuko byabereye mu Bufaransa. Colombe ubu asigaye ahugiye mu bikorwa bye byo kumurika imideli ndetse akaba anagaragariza abantu ko afite ubumenyi mu myitozo ngorora mubiri.
