Minnaert yihaye intego idasanzwe yafasha Rayon Sports kwegukana shampiyona
Umutoza mukuru w’ikipe ya Rayon Sports Ivan Jack Minnaert, yatangaje ko Rayon Sports ifite intego yo gutsinda imikino 10 yose isigaye ngo shampiyona irangire, kugira ngo ibashe kwisubiza igikombe cya shampiyona.
Mu kiganiro uyu nutoza yagiranye n’urubuga rw’ikipe ya Rayon Sports, yavuze ko Rayon Sports igifite amahirwe yo kwegukana igikombe cya shampiyona, gusa ngo kubigeraho ni uko bagomba gutsinda amakipe yose bashigaje gukina na yo nta nimwe bababariye.
“Turacyafite amahirwe yo kwegukana igikombe kuko tugomba gutsinda imikino 10 yose dusigaje duhereye kuri Miroplast FC kugirango tubashe kwegukana igikombe cya shampiyona .”
Magingo aya Rayon Sports ihagaze ku mwanya wa kane ku rutonde rwa shampiyona y’ikiciro cya mbere n’amanota 37, amanota 13 inyuma ya APR FC iyoboye shampiyona y’u Rwanda n’amanota 50, gusa Rayon Sports ifite imikino ine y’ibirarane harimo uw’umunsi wa 25 wa shampiyona icakiranamo na Miroplast uyu munsi.
Mu yindi mikino iyi kipe isigaje, harimo uwo izacakiranamo na AS Kigali, uwo izahuramo n’Amagaju, uwo izasuramo Musanze, uwo izahuriramo na Polisi, hakaza uwo izasuramo APR FC, uwo izakiramo Gicumbi, nyuma ya Gicumbi izajya gusura Espoir, haze umukino izakiramo Sunrise, nyuma ya Sunrise isure FC Marines ku mukino w’umunsi wa nyuma wa shampiyona.
