MINISPOC nta nkunga izaha amakipe azahagararira u Rwanda mu mikino Nyafurika
Ishyirahamwe ry’umupira w’amaguru mu Rwanda FERWAFA mu minsi ishize yari iherutse kwandikira MINISPOC isabira inkunga APR FC na Mukura VS zizasohokera u Rwanda mu mikino Nyafurika ,nyuma y’ubu busabe Minisiteri yaje gusubiza ivuga ko nta ngengo y’imari ihari yateganyirijwe iyo mikino (Caf Champions League na Caf Confederation Cup ).
Kuri iyi nshuro Ferwafa yari yagerageje gusabira amakipe azahagararira u Rwanda hakiri kare gusa nubundi Minisiteri y’Umuco na Siporo yabasubije ibabwira ko nta nkunga igenewe aya makipe yateganyijwe mu ngengo y’imari.
Ibi si ubwa mbere bibaye dore ko n’umwaka ushize ubwo Rayon sports na APR Fc zabwirwaga ko nta nkunga zizahabwa na Minisiteri y’Umuco na Siporo nk’amakipe azahagararira u Rwanda mu mikino nyafurika gusa bo babwiwe ko batinze kubisaba.
Ikipe ya Mukura Vs kugeza ubu isabwa arenga Miliyoni 20 mu kugirango ibashe gukina imikino ibiri izayihuza n’ikipe ya Free State Star yo mu gihugu cy’Afurika yepfo aho biteganyijwe ko irahaguruka i Kigali kuwa mbere w’Icyumweru gitaha yerekeza muri Afurika yepfo gukina umukino ubanza.
