Minisitiri w’intebe w’Ubwongereza bamusanzemo coronavirus
Kuri uyu wa Gatanu tariki ya 27 Werurwe 2020, Ibiro bya minisitiri w’intebe w’Ubwongereza byatangaje ko Boris Johnson bamusanzemo Covid-19.
Itangazo rivuga ko basanze afite ibimenyetso bya coronavirus byoroheje kandi azaguma mu kato aho akorera muri Downing Street.
Kuri Twitter,Boris Johnson yanditse ati: “Mu masaha 24 ashize nagize ibimenyetso byoroheje bansuzumye bansangamo coronavirus.
“Ubu nishyize mu kato, ariko nzakomeza kuyobora guverinoma mu nama kuri video dukomeze kurwanya iyi virus”.
Ejo kuwa kane nimugoroba nibwo Johnson yagaragaye imbere y’ibiro bye nawe akomera amashyi ibiro bishinzwe kurwanya iyi ndwara mu Bwongereza.
Mu ntangiriro z’uku kwezi, Nadine Dorries, umudepite akaba n’umuyobozi mukuru wo muri minisiteri y’ubuzima mu Bwongereza, bamupimye basanga afite coronavirus.
Mu minsi ishize,igikomangoma cy’Ubwongereza, Charles binateganywa ko ari we wasimbura Umwamikazi, cyatangaje ko cyanduye Coronavirus.
Mu Bwongereza habarwa abantu barenga 11,600 banduye iyi ndwara, muri bo yishe 578 naho abayikize ni 135.
