Minisiteri y’Ubuzima yategetse abakora mu by’ubuzima bose kwikingiza Covid-19
Mu gihe mu bihugu bimwe na bimwe bikomeje gusaba abaturage babyo kwikingiza Covid19 mu rwego rwo guhashy iki cyorezo , Minisiteri y’Ubuzima(MINISANTE) yasabye inzego ziyobora abakora mu bijyanye n’Ubuzima bose kubategeka gufata urukingo rwa Covid-19 bitarenze iminsi 10 guhera igihe izo nzego zakiririye urwandiko.
Mu ibaruwa yashyizweho umukono na Minisitiri w’Ubuzima Dr Daniel Ngamije yahawe Minisiteri ishinzwe imirimo y’Inama y’Abaminisitiri, Minisiteri y’Abakozi ba Leta n’Umurimo (MIFOTRA), Minisiteri y’Ubutegetsi bw’Igihugu(MINALOC) hamwe n’Abayobozi b’Uturere bose.
Iyi baruwa igamije kwibutsa bwa nyuma abakora mu by’ubuzima bose guhabwa Urukingo rwa Covid-19, mu rwego rwo kwirinda no kurinda abo bashinzwe guha serivisi.
“Mboneyeho gusaba abakozi bose bakora mu bigo by’ubuvuzi mushinzwe, gufata urukingo rwa Covid-19,…Nibutsa abakozi bose batarafata urwo rukingo ko bagomba kuruhabwa bitarenze iminsi 10 kuva igihe mwakiririye uru rwandiko”.
Minisitiri w’Ubuzima yasabye inzego yandikiye ko nyuma y’iyo minsi 10 zamwoherereza urutonde rw’abantu bose banze gufata urukingo rwa Covid-19.
Muri iyi baruwa minisiteri y’Ubuzima ivuga ko inkingo z’icyorezo Covid-19 zigenda ziboneka, zikaba zaragenewe abantu bose kugeza ubu guhera ku bafite imyaka 12 y’ubukure.
Kugeza ku wa Kabiri tariki 16 Ugushyingo 2021 Abaturarwanda barengeje imyaka 18 y’ubukure bamaze guhabwa doze ya mbere y’Urukingo rwa Covid-19 bararenga miliyoni eshanu n’ibihumbi 179.
