Mico Justin wakiniraga Police FC yerekeje muri Kenya
Rutahizamu Mico Justin wakiniraga ikipe ya Police FC yamaze kwerekeza muri Sofapaka FC yo mu gihugu cya Kenya, atanzweho angana n’ibihumbi 20 by’amadorali ya Amerika.
Amakuru avuga ko uyu musore ukomoka mu karere ka Musanze azajya anahembwa amadorali ya Amerika 1500 ku kwezi.
Ibi bibaye nyuma y’uko uyu musore Polisi FC yashatse kumwongerera amasezerano gusa bikarangira abyanze, mu gihe byavugwaga ko iyi Sofapaka imwifuza ndetse n’andi makipe ya hano mu Rwanda arimo APR FC na Rayon Sports.
Uyu musore usanzwe anavukana na Ndayisaba Olivier ukinira Musanze FC yamenyekanye muri 2010 ubwo yari kumwe n’ikipe y’igihugu y’abatarengeje imyaka 17 muri CAN yabereye i Kigali, nyuma aza no kujyana na yo mu gikombe cy’isi cyabereye muri Mexique.
Nyuma yo gukomeza kwigaragaza, ikipe ya Police FC yahise imubenguka, imugura mu kipe y’isonga yari asanzwe akinira imuzananye na Danny Usengimana wayivuyemo muri 2017 akerekeza muri Singida United yo muri Tanzania.
