Meddie Kagere yaciye agahigo gakomeye muri Simba SC ataramaramo n’umwaka
Rutahizamu w’ikipe y’igihugu Amavubi Meddie Kagere, yaraye aciye agahigo ko kuzuza imikino 50 amaze gukinira Simba SC yo muri Tanzania, mu gihe hatarashira n’umwaka umwe ayigezemo.
Ku wa 26 Kamena 2018 ni bwo uyu musore yasinyiye Simba SC amasezerano y’imyaka ibiri, nyuma yo gutandukana na Gor Mahia yo muri Kenya yamugaragarije urukundo ruke nk’uko yakunze kubigarukaho.
Kagere wageze muri Simba SC batamwemera ngo kuko babonaga ko ageze mu zabukuru, ntiyatinze kwigaragaza nka rutahizamu ukomeye w’iyi kipe ikunzwe n’abatari bake muri Tanzania. Ubuhamya bwatangwa n’amakipe ya Azam na Young Africans yagiye ahungabanyiriza ubwugarizi, ndetse n’amakipe ya Nkana FC yo muri Zambia, JS Saoura yo muri Algeria na Al Ahly yo mu Misiri yahuriye na we mu mikino ya CAF Champions league.
Umukino wa 50 Meddie Kagere yawujuje ku munsi w’ejo ubwo Simba yakinaga na Ndanda FC mu mukino wa shampiyona. Muri uyu mukino, Simba SC yatsinze ibitego 2-0 byombi byatsinzwe na Meddie Kagere.
Ibi byatumye yuzuza ibitego 33 amaze gutsindira ikipe ya Simba mu mikino 50 amaze kuyikinira, ndetse akaba yaranatanze imipira ibiri yavuyemo ibitego.
Muri ibi bitego, harimo 22 Meddie Kagere amaza gutsinda muri shampiyona y’uyu mwaka w’imikino wa 2018/2019.
